کابل (پژواک، ١٦ غويی ٩٥): د هندوستان په پوځي اکاډمۍ کې لسګونه افغان محصلين وايي چې هېڅ ډول ستونزې نه لري او پوځي زده کړې یې په اساسي توګه روانې دي.
يادو محصلينو دغه څرګندونې له افغان ژورنالېستانو سره د ليدنې پر مهال وکړې.
د هند د بهرنيو چارو وزارت په بلنه د پژواک خبري اژانس د خبريال په ګډون ١٣ نور افغان خبريالان دغه هېواد ته غوښتل شوي وو تر څو د يادې اکاډمۍ تر څنګ له نورو ځايونو هم ليدنې وکړي.
د هند دغه پرمختللې پوځي اکاډمي د دغه هېواد په دهرادون ايالات کې موقعيت لري چې له پلازمېنې ډيلي څخه کابو درې سوه کيلومتره واټن لري.
دا مهال په دې اکاډمۍ ١٠٧ تنه افغان محصلين چې ټول نارينه دي، د نظري درسونو تر څنګ عملي زده کړې هم ورکول کېږي.
په دې اکاډمۍ کې محصلين څلور کاله زده کړې کوي چې د نورو پوځي روزنو تر څنګ د اسونو سپرلي او لامبو وهل هم ور زده کول کېږي.
په دې اکاډمۍ د افغان محصلينو په استازيتوب اسلام الدين پژواک ته وويل چې له څلورو کلونو راهيسې په دې اکاډمۍ کې زده کړې کوي.
هغه وويل: ((موږ دلته هېڅ ډول ستونزې نه لرو، په اساسي توګه روزنه راکول کېږي او زما ډېر لږ وخت پاتې دى چې فارغ شم.))
ده وويل چې د هرې مياشتې په پای کې زده کوونکو ته نغدې پيسې هم ورکول کېږي تر څو خپلې ورځنۍ اړتیاوې پرې پوره کړي.
هغه زياته کړه: ((دا پيسې يواځې موږ ته د جېب خرڅ لپاره راکول کېږي، د خوب ځاى او مکلفه ډوډۍ د اکاډمۍ له خوا راکول کېږي.))
د هغه د معلوماتو له مخې، له دغه پوهنتون څخه زده کوونکي د دويم بريدمن په رتبه فارغېږي.
په دې اکاډمۍ کې د افغان محصلينو ښوونکي تورن کامبيز عصمتي پژواک ته وويل هر محصل چې په دې اکاډمۍ شاملېږي په اساسي توګه پوځي روزنه ورکول کېږي.
د هغه د معلوماتو له مخې، په دې اکاډمۍ کې زده کوونکو د کال ١١ مياشتې زده کړې ورکول کېږي.
ده وويل: ((موږ دلته د لامبو وهلو يو حوض لرو، هر محصل اړ دى چې د لسو مترو له لوړوالي څخه ځان دغه حوض ته وغورځوي او که چېرې په هر سمستر کې يو ځل دغه کار ونه کړي، ناکامېږي.))
د هغه په وينا، کوم محصل چې په وار وار په لامبو وهلو کې ناکام شي، نو بيا له اکاډمۍ څخه ايستل کېږي.
عصمتي وايي، کله چې افغان محصلین له دغه ځایه فارغېږي په مستقیمه توګه د افغانستان د ملي دفاع وزارت د بهرنیو اړیکو ریاست ته ورپېژندل کېږي.
ده وويل چې دغه ریاست د دوی د سندونو له څېړلو وروسته د دغو افسرانو رتبې ټاکي او د پچې اچونې له مخې يې پر دندو ګوماري.
هغه وايي چې په دې اکاډمۍ افغان محصلينو ته د هېوادنۍ مينې په اړه هم زده کړې ورکول کېږي.
عصمتي پر افغان محصلينو غږ وکړ، هلکانو د کوم ځای یاست!! ټولو په يو غږ وويل: ((افغانستان، افغانستان، افغانستان.))
د هغه د معلوماتو له مخې، تر اوسه کابو ۳زره افغان افسران له دې اکاډمۍ فارغ شوي او دا تر ټولو لوی شمېر دی چې له بهرنیو پوځي مرکزونو څخه یې د فراغت سندونه ترلاسه کړي دي.
د هند پوځي اکاډمي په ۱۹۳۲ زېږدیز کال کې د انګلستان هېواد له خوا جوړه شوې ده.
غړيYou need to subscribe to view the full article. Please login or register a new account.










