منځپانګې ته تلل
چهارشنبه ۱۸ نومبر ۲۰۲۶ · کابل ۳:۴۵ غ.و
۱۴°صاف · ↑۱۴° ↓۱°د هوا کیفیت: منځنی
غړي

“که د شینوارو ښوونځي فعال نه شي، نورو سیمو ته یې لېږدوو”

· ۲ دقیقې لوستل · ۸۶ کتنې

جلال اباد (پژواک، ۱۵ غبرګولی ۹۵): د ننګرهار د والي مرستيال وايي، که د شينوارو د تړل شوو ښوونځيو د فعالېدو هڅې ناکامې شي، دا ښوونځي به امنو سيمو ته انتقال کړي.

د ننګرهار د والي مرستيال محمدحنيف ګرديوال دا څرګندونې د غبرګولي په ۱۵مه د هسکې مينې له کثيرالرشتيوي انستيټيوټ څخه د ۹۵ محصلينو د فراغت په مراسمو کې وکړې.

دغو محصلينو د ياد انيستيټيوټ په لومړۍ دوره کې د موټرو د تخنيک او برېښنا په برخه کې دوه کلنې زده کړې ترلاسه کړې دي.

د ننګرهارد والي مرستيال د يادې غونډې په څنډه کې پژواک اژانس ته وويل، د شينوارو په ځينو ناامنو سيمو کې ۳۲ ښوونځي تړلي دي.

ګرديوال وايي: ((حکومت او قومي مشران د دې تړل شوو ښوونځيو د پرانيستلو هځې پيل کړې، خو که دا هڅې بريالۍ نه شوې موږ دا ښوونځي امنو سيمو ته را انتقالو.))

د والي مرستيال له ياد انسټيټيوټ څخه د ۹۵ محصلينو فراغت لاسته راوړنه وبلله او هيله يې څرګنده کړه چې فارغ شوي کسان په خپلو رشتو کې کار وکړي.

بلخوا د ننګرهار د پوهنې رييس استاد الله داد اسمعيل زي وويل، پخوا د شينوارو په ولسوالۍ کې نږدې ۵۰ ښوونځي تړل شوي وو خو اوس ۳۲ ته راټيت شوي دي.

د پوهنې رييس وايي: ((په اچين کې ۱۷، په هسکې مينې کې اته او په کوټ ولسوالۍ کې اوه ښوونځي تړلي دي، موږ هڅه کوو دا ښوونځي بېرته فعال شي.))

د پوهنې رييس د هسکې مينې انيستيټيوټ د زده کړو لپاره ښه زمينه وبلله او يادونه يې وکړه، چې نور ډېر محصلين به هم جذب کړي.

د ننګرهار د ولايتي شورا غړي اجمل عمر په دې غونډه کې د ننګرهار د پوهنې ادارې مديريت ناکام وباله او يادونه يې وکړه چې خپلې چارې دې ښې تنظيم کړي.

عمر وويل: ((په شينوارو کې ډېر ښوونځي تړلي دي، په ځينو نورو سيمو کې ښوونځي او زده کوونکي ډېرې ستونزې لري بايد دې ټولو ته پاملرنه وشي.))

د نوموړي په وينا، هغه ښوونځي چې تړلي دي، بايد زده کوونکي يې د نورو سيمو ښوونځي ته د زده کړو لپاره ولېږل شي.

د ياده غونډه کې يو شمېر محصلينو او قومي مشرانو په خپلو خبرو کې پر حکومت غږ وکړ، څو د شينوارو معارف ته پاملرنه ډېره کړي.

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه