چغچران(پژواک، ١٧غبرګولي٩٥): په غور ولايت کې د سولې عالي شورا د ولايتي کمېټې غړى او په دې ولايت کې د حزب اسلامي يو پخوانى قوماندان نصرت الله نصرت د يو ناپېژانده وسله وال په بريد کې ووژل شو.
د غور د والي وياند عبدالحى خطيبي پژواک خبري اژانس ته وويل چې نصرت تېره ورځ د دې ولايت په مرکز کې د پوليسو د عملياتې قطعې مخې ته د يو ناپېژانده موټرسايکل سپور له خوا د تومانچې په ډزو هغه مهال ووژل شو، چې په بازار کې د مېوې پر پېرلو بوخت و.
هغه وايي چې نصرت يو قومي مشر او په دې ولايت کې د حزب اسلامي له پخوانيو قوماندانانو څخه و.
د غور امنيه قوماندان مل پاسوال مصطفى حسيني وايي، چې پوليسو د نصرت ساتونکى نيولى، ځکه چې د بريد پر مهال له نصرت سره و، خو له هغه څخه د ساتنې په موخه يې هېڅ اقدام نه دى کړى.
د حسيني په وينا، پر نصرالله بريدکوونکى تښتېدلى، خو پوليسو يې د نيولو هڅې پيل کړي دي.
تر دې مخکې هم د سولې شورا او د دې شورا د ولايتي کمېټو يو شمېر غړي وژل شوي دي.
په ١٣٩٠ کال کې د يادې شورا مشر برهان الدين رباني کابل کې په يو ځانمرګي بريد کې ووژل شو. دغه راز په ١٣٩١ کال کې د دې شورا بل مهم غړى ارسلا رحماني هم کابل کې په يو بريد کې ووژل شو.
دغه راز د پژواک د يو راپور له مخې، تېر کال تر وږي مياشتې د سولې شورا او د دې شورا د ولايتي کمېتې ٣١ نور غړي د هېواد په بېلابېلو ولايتونو کې وژل شوي وو.
د سولې شورا په ١٣٨٩ کال کې کار پيل کړى او موخه يې د سولې له پروسې سره د دولت د وسله والو مخالفينو يو ځاى کېدل دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن