کندهار (پژواک، ۲ چنکاښ ۹۵): د کندهار د پوهنې رياست چارواکي وايي، د دې ولايت په ميوند ولسوالۍ کې د دريو ښوونځيو لپاره ودانۍ جوړوي چې لګښت يې د ملي پيوستون له پيسو ورکول کېږي.
دغه درې ودانۍ د ملالۍ ميوندي، سيد محمد اغا په نوم ښوونځيو او د غازي محمد ايوب خان په نوم د يوې ليسې دي چې د جوړولو چارې يې د کندهار د پوهنې د رييس عبدالقادر پيوستون، د ميوند د ولسوال حاجي عبيدالله او د قومي مخورو له خوا پيل شوې.
د کندهار د پوهنې رييس عبدالقادر پيوستون پژواک خبري اژانس ته وويل، يادو شوو دريو ښوونځيو له دې مخکې ودانۍ نه لرلې او زده کوونکو يې تر شنه اسمان لاندې زده کړې کولې.
هغه زياته کړه، دغه ودانۍ د ملي پيوستون د پروګرام اړوند د ١٦ ميليونه افغانيو په لګښت د دريو مياشتو په موده کې جوړېږي.
د ده په خبره، هر ودانۍ به ٨ تدريسي خونې، اداره، اړوند نور ملحقات او د ښوونکو او زده کوونکو لپاره ګڼې اسانتياوې ولري.
پيوستون خوښي وښودله چې د دې ولسوالي اوسېدونکو او مخورو ورسره منلې چې د ملي پيوستون پروګرام يوه اندازه پيسې د خپلو اولادونو د پوهنې د ودې په موخه ولګوي.
login or register a new account.
