ښرنه (پژواک،١٣ليندۍ٩٥): د پکتيکا په مټاخان ولسوالۍ کې ګڼ شمېر ځوانانو ته د کار زمينه برابره شوې چې له امله يې سږ کال پاکستان ته د مزدورۍ لپاره نه دي تللي.
د مټاخان د سيمه ييزې شورا مشر مدثر اندړ د ليندۍ په ١٣مه پژواک خبري اژانس ته وويل چې د کليو پراختيا رياست په دې ولسوالۍ کې ځينې پروژې پيل کړي چې سلګونو ځوانانو ته په کې د کار زمينه برابره شوې ده.
هغه وايې: (( هرکال سلګونه ځوانان د کار کولو په موخه پاکستان ته تلل، خو کله چې په دې ولسوالۍ کې د کليو پراختيا رياست له لوري د کليوالي شوراګانو په مرسته کارونه پيل شول هغه ټول ځوانان را ګرځېدلي او په خپل هيواد او ولسوالۍ کې په کار بوخت دي.))
د نوموړي په خبره، که له يوې خوا د دې ولسوالۍ ځوانان ګاونډي هيواد پاکستان ته له تلو او مزدورۍ څخه منع شوي بل پلو د ولسونو ګڼ شمېر ستونزې هم په دې پروژو هواريږي.
د مټاخان اوسېدونکي احمد الله چې هر کال به ګاونډي هيواد پاکستان ته د کار کولو په موخه تللو پژواک ته وويل چې دولت بايد ددې ولايت په ټولو ولسواليو کې رغنيزې پروژې پيل کړي، ترڅو ځوانان د پرديو له مزدريو څخه خلاص شي.
هغه زياته کړه: (( په پاکستان کې به مو له سهار تر بيګاه کار کاوه، خو ماښام به مو لاسته ۴۰۰ کلدارې راتلې، ۲۰۰ به مو مصرف راته، د پاکستان پوليسو له لوري به هم په يو او بل نامه ځورېدو، خو اوس راته په خپل کورکې د کار زمينه برابره شوې ده.))
ددې ولسوالۍ بل اوسېدونکي سيدګل پژواک ته وويل چې د کليو او پراختيا رياست له لوري په دې ولسوالۍ کې د پاکو اوبو او ځينو لارو د جوړولو چارې پيل شوې دي.
هغه زياته کړه:(( موږ له دې پروژو څخه ډير خوښ يو ځکه زموږ سلګونه ځوانان په کې کار کوي او پاکستان ته له تلو څخه هم پاتې شوي دي.))
د پکتيکا د کليو پراختيا رياست مرستيال انجنير مومن پژواک ته وويل چې په مټاخان ولسوالۍ کې د ۱۰ ميليونو افغانيو په لګښت پروژې پيل شوې دي.
هغه وايي چې دغه پروژې د سيمې د خلکو په خوښه پيل شوي او ترڅنګ يې نږدې زرو ځوانانو ته په کې د کار زمينه هم برابره شوې ده.
د هغه په خبره، دوی د پکتيکا د مرکز په ګډون په ۱۱ ولسواليو کې ورته پروژې پيل کړي چې زرګونو کسانو ته يي د کار زمينه برابره کړې ده.
مټاخان د مرکز ښرنې ختيځ ته پرته ولسوالۍ ده چې د اوسېدونکو په وينا يې په تېرو کلونو کې ورته اړينه پاملرنه نه ده شوې او ګڼې ستونزې لري.
غړيYou need to subscribe to view the full article. Please login or register a new account.










