مهترلام (پژواک، ١٧ ليندۍ ٩٥): د لغمان چارواکي وايي چې د وسله والو مخالفينو په يوه بريد کې پنځه ملکي وګړي ټپيان شوي دي.
د لغمان د والي وياند سرحدي ځواک د ليندۍ په ١٧مه پژواک خبري اژانس ته وويل چې دا پېښه نن سهار د ولايت د مرکز مهترلام ښار اړوند د عمرزيو په سيمه کې رامنځته شوې ده.
هغه زياته کړه چې په ياده سيمه کې د افغان ځواکونو چاڼيز عمليات روان وو چې د وسله والو مخالفينو له لوري توغول شوې د هاوان مرمۍ پر يوه کور ولګېده.
ځواک وايي چې په دې پېښه کې د يوې کورنۍ څلور غړي او د يوې بلې کورنۍ يو دوولس کلن ماشوم ټپيان شوي دي.
د نوموړي په وينا، په ټپيانو کې يوه ٤٠ کلنه مېرمن، ١٤ کلنه نجلۍ، ١٨ کلن ځوان او دوه ماشومان شامل دي.
د والي وياند وويل چې ټپيان روغتون ته لېږدول شوي، خو د روغتيايي حالت په اړه يې معلومات نه درلودل.
وسله والو طالبانو تر اوسه په دې اړه څه نه دي ويلي.
You need to subscribe to view the full article. Please login or register a new account.
