کندهار (پژواک، ٢٤ سلواغه ٩٥): د کندهار د شاولیکوټ ولسوالۍ اوسېدونکي وايي، د پوهنې، روغتیا، کرنې او د ژوندانه په نورو برخو کې له ستونزو سره مخامخ دي.
هغوی په دغو برخو کې د خدماتو او اسانتیاوو غوښتنه کوي او وايي چې ولایتي اداره دې دغې ولسوالۍ ته پاملرنه وکړي.
د شاولیکوټ ولسوالۍ د شورا مشر حاجي ظاهر جان پژواک خبري اژانس ته وویل، په دې ولسوالۍ کې ۱۵ ښوونځي تړلي دي چې له امله یې زرګونه ماشومان او نجونې له زده کړو بې برخې دي.
هغه زیاته کړه، د دې ولسوالۍ په مرکز کې یواځې دوه ښوونځي فعال دي چې په هغو کې هم د ښوونې بهیر معیاري نه دی.
نوموړی له چارواکو غوښتنه کوي چې تړل شوي ښوونځي دې د دې ولسوالۍ په هغو سیمو کې فعال کړي چې امنیت یې ښه دی.
دی وايي، په دې توګه به د ولسوالۍ له زده کړو بې برخې ماشومان له زده کړو برخمن شي.
دغه قومي مشر دغه راز د روغتیا په برخه کې هم د کافي اسانتیاوو له نشتوالي شکایت وکړ او ویې ویل، اوسني وړاندې کېدونکي خدمات د ټولې ولسوالۍ د اوسېدونکو لپاره بسنه نه کوي.
هغه غوښتنه وکړه چې په دې ولسوالۍ کې دې د روغتیايي مرکزونو شمېر ډېر شي، څو خلک په دې برخه کې له ستونزو خلاص شي.
د ده په خبره، اوسمهال ډېر ناروغان اړ کېږي چې کندهار ښار ته د درملنې لپاره لاړ شي، په داسې حال کې چې د دې ولسوالې ډېری اوسېدونکي غربت ځپلي دي.
د شاولیکوټ ولسوالۍ یو بل اوسېدونکي عبدالشکور بیا دې ولسوالۍ ته د غځېدلي سړک له خرابوالي شکایت کوي او وايي، حکومت دې د دې ولسوالۍ سړک ورغوي.
دی زياتوي، دغه سړک اوس مهال ډېر خراب شوی چې خلک د تګ راتګ پر مهال پرې له ډېرو ستونزو سره مخامخ دي.
نوموړي دغه راز یادونه وکړه چې دغه ولسوالي یوه کرنیزه ولسوالي ده، خو د کرنې د ودې لپاره په کې ډېر کار نه دی شوی.
دی دا غوښتنه هم کوي چې د دې ولسوالۍ لوستي ځوانان دې په همدې ولسوالۍ کې په دولتي چوکاټ کې جذب کړای شي، څو هم په کار بوخت شي او هم خپلو خلکو ته کار وکړای شي.
نوموړی د یوې بلې ستونزې یادونه هم وکړه چې ډېر مهال امنیتي ارګانونه د دې ولسوالۍ بې ګناه ځوانان په یوه او بل نامه نیسي او بندیانوي یې چې ګواکې له وسله والو سره اړیکې لري.
د ده په خبره، له ثبوت او شواهدو پرته دغه راز نیونې ښې پایلې نه لري او حکومت او خلکو تر منځ واټن پیدا کوي.
د کندهار سرپرست والي عبدالحنان منیب چې د یوه پلاوي په ملتیا یې نن دغې ولسوالۍ ته سفر کړی و، د خلکو ستونزې پر ځای ګڼي او وايي، د هواري لپاره یې هڅې کوي.
ده وویل، همدا نن د خلکو د روغتیايي اسانتیاوو د حل په موخه یو BHC روغتیايي مرکز پرانیستل شو چې ودانۍ یې نوې جوړه شوې ده.
ده یادونه وکړه چې دغه روغتیايي مرکز به د خلکو روغتیايي ستونزې تر ډېره بریده راکمې کړي.
نوموړي وویل، د خلکو له غوښتنې سره سم به د پوهنې ریاست ته سپارښتنه وکړي چې تړل شوي ښوونځي د دغې ولسوالۍ امنو سیمو ته راولېږدوي او د زده کوونکو پر مخ یې پرانیزي.
هغه دغه راز د کرنې د ودې په برخه کې هم ژمنه وکړه چې دغې ولسوالۍ ته به پاملرنه کوي.
منیب وايي، ولایتي اداره له شته امکاناتو سره سم په ټولو ولسوالیو کې متوازنې پرمختیا ته ژمنه ده او په دې برخه کې له ولس سره ګډ کار کوي.
شاولیکوټ ولسوالي د کندهار ښار شمال شرق لوري ته په ٤٠ کيلو متره واټن کې پرته ده چې د دې ولایت له ګڼ نفوسو ولسواليو څخه ده.
د دغې ولسوالۍ ډېرې برخې ناامنې او وسله وال په کې فعال دي چې د کندهار- اروزګان لار هم له دې ولسوالۍ څخه تېرېږي.
غړيYou need to subscribe to view the full article. Please login or register a new account.
