<p>کندهار(پژواک د سلواغې ۲۷مه، ۱۳۹۵): چارواکو په کندهار کې د پسرلني کمپاین د پیلولو پر مهال وویل چې په کندهار ښار او ۱۷ ولسوالیو کې به ۱،۵ میلیونه نیالګي ولګول شي.</p>
<p>دغه کمپاین ته "یو نیالګی د ځان لپاره او یو نیالګی د هېواد لپاره" نوم ورکړل شوی دی.</p>
<p>په دې کمپاین کې د کندهار سرپرست والي عبدالحنان منيب، کندهار ښاروال انجنیر روښان ولسمل، د کرنې رییس حفیظ الله سعید او نورو ګډون کړی و.</p>
<p>د کندهار سرپرست والي وویل، سږ کال به په کندهار ښار او ولسوالیو کې یو نیم میلیون نیالګي ولګول شي.</p>
<p>خو ده له خلکو وغوښتل چې د دغو نیالګیو په پالنه او ساتنه کې برخه واخلي.</p>
<p>د کندهار د کرنې رییس وویل، د کندهار ښار او ۱۷ ولسوالیو لپاره د کرنې ریاست، ښاروالۍ، خصوصي سکتور او یو شمېر موسساتو په مرسته یونیم میلیون مېوه لرونکي او بې مېوې نیالګي چمتو شوي چې د لګولو لړۍ یې نن پیل شوه.</p>
<p>هغه زیاته کړه، د یو نیالګی د ځان لپاره او یو نیالګی د هېواد لپاره کمپاین په لړ کې به پر ۵ زره جریبه ځمکه د مېوه لرونکو نیالګو باغونه هم جوړ شي.</p>
<p>د کرنې رییس هم وویل چې هر کال یو شمېر زیات نیالګي د نه پاملرنې او ساتنې له امله وچېږي.</p>
<p>ده په دې برخه کې د خلکو مرسته ډېره مهمه وبلله او ویې ویل ایښودل شوي نیالګي شاوخوا درې کلونه ساتنه غواړي چې دوی یې په یوازې ځان نه شي کولای.</p>
<p>هغه دا هم وویل چې پخوا به نیالګي د کرښې له هغې غاړې راوړل کېدل چې تر ډېره به یې د دې ځای له اقلیم سره به جوړ نه وو او ډېر به وچېدل، خو په دې وروستیو کې په هېواد کې د ننه د نیالګيو روزنې وده کړې او چمتو شوي ټول نیالګي په هېواد کې دننه روزل شوي دي.</p>
<p>د کندهار اوسېدونکي د پسرلني کمپاین د پیل هرکلی کوي خو وايي حکومت دې د نیالګيو د ایښودلو تر څنګ د هغو د ساتنې او پالنې غم هم وخوري.</p>
<p>د کندهار ښار اوسېدونکي قدرت الله کامران پژواک اژانس ته وویل، هر کال سلګونه زره نیالګي ايښودل کېږي خو ډېر کم یې لګېږي او پاته کېږي.</p>
<p>ده وویل، دا سمه ده چې خلک هم باید د نیالګیو په ساتنه کې ونډه واخلي، خو ډېر کار حکومت کولای شي، څو داسې یو چوکاټ جوړ کړي چې په ګډه د نیالګیو ساتنه او پالنه وشي.</p>
<p>د یادونې ده چې د هېواد په بېلابېلو ولایتونو کې د نیالګیو ایښودلو پسرلنی کمپاین پیل شوی چې په دې لړ کې به د هېواد په کچه میلیونه نیالګي ولګول شي.</p>
