کابل (پژواک، ٣ کب ٩٥): د ولسمشر غني په حضور کې د ټاپي ګاز نل لیکې پروژې د انجنیرۍ ډیزاین چارو د پرانیستې تفاهم لیک لاسلیک شو.
دغه تفاهم ليک د افغان ګاز کمپنۍ سرپرست عبدالقیوم رشید او د ای، ایل، ایف کمپنۍ مشر سټيفن، نن له غرمې مخکې په ارګ کې لاسلیک کړ.
په دې اړه جوړه شوې غونډه کې د زېربنا په چارو کې د ولسمشر ستر سلاکار ډاکټر محمد همایون قیومي وویل، د خوښۍ ځای دی چې د دغې ملي او سیمه ییزه پروژې د بشپړتیا په برخه کې یو مهم ګام اخلي او په افغانستان کې د ټاپي پروژې د کار د پیل د برخې تفاهم لیک لاسلیکوي.
ده زياته کړه، دا پروژه یواځې د ګازو نل لیکه نه ده، بلکې د نوري فایبرد لېږد لپاره یو اقتصادي دهلېز دی چې ترکمنستان، افغانستان، هند او پاکستان سره نښلوي او همدارنګه دغه هېوادونه له اروپا سره نښلوي.
نوموړي له ولسمشر غني او همدارنګه د ترکمنستان له جمهور رئیس څخه په مننې چې د افغانستان د پرمختګ او ثبات په نیت یې ټاپي پروژه پرانیستله، وویل، ټاپي د هغو ولایتونو اوسېدونکو ته چې دا پروژه ورڅخه تېرېږي، د کار زمینه برابروي.
د هغه په وينا، نن د ټولو افغانانو لپاره د ویاړ ورځ ده چې د اشرف غني د لیدلوري له برکته، نن د دې لویې پروژې د بشپړتیا لپاره یو ستر ګام اخلو.
د کانونو او پټرولیم وزارت سرپرستې غزال حبیب یار دغو مراسمو ته د وینا پرمهال وویل، ټاپي پروژه چې د ٧،٤ میلیون امریکایي ډالرو په لګښت په دوو پړاوونو کې بشپړېږي، د افغانستان او د سیمې هېوادونو لپاره د ثبات د تامین، د انرژۍ د تمویل او له اقتصادي او اجتماعي پلوه زیات ارزښت لري.
هغې زياته کړه، د ګازو د نل لیکې پروژې لومړی پړاو د پروژې د امنیت تنظیم، موافقتنامې، د پروژې طرحه او ډیزاین، د پروژې محیط زیستي او اجتماعي مطالعات، ماین پاکي، د ګازو نل لیکې د مسیر د جزئیاتو سروې او د ځمکې د استملاک سروې ده، چې په یو کال کې به بشپړ شي.
نوموړې څرګنده کړه، د ټاپي پروژې دویم پړاو چې بشپړول به یې درې کاله وخت ونیسي، په اساسي توګه د پروژې عملي تطبیق دی.
د دې په خبره، ټاپي د ګازو نل لیکه چې ۱۷۳۵ کیلومتره اوږدوالی او په کال کې د ۳۳ میلیارد متر مکعب ګاز د انتقال ظرفیت لري، له ترکمنستان څخه پیل د هرات، فراه، هلمند، نیمروز او سپین بولدک له لارې پاکستان او هندوستان ته غځېږي.
د کانونو او پټرولیم سرپرستې وزیرې څرګنده کړه، افغانستان به د ټاپي ګازو نل لیکې له لارې د کال ۴۰۰ میلیون ډالر د ګازو ترانزیټ ترلاسه کړي. افغانستان به د منځنۍ اسیا د ترانزیټ په مرکز بدل کړي او د افغانستان لپاره به مهم اقتصادي دهلېز وي، ځکه د ټاپي مسیر کې ځینې نورې پروژې، لکه د برېښنا لېږد، د اورګاډي کرښې جوړول او د صنعتي پارکونو تاسیس، د نوري فایبر انتقال او نورهم په پام کې دي.
هغې زیاته کړه، د افغانستان حکومت د ټاپي د ګازو نل لیکې پروژې تطبیق د تیاري لپاره له هغو اړوندو وزارتونو او ادارو سره چې په مستقیم او غیر مستقیم ډول د پروژې تطبیق کې شامل دي، بحثونه پیل کړي دي.
د ټاپي لمېټډ شرکت عامل رئیس محمد مراد امانوف، دغو مراسمو ته د وینا پرمهال د ټاپي پروژې د کار پرمختګ زمینې برابرولو په هکله د جمهور رئیس له پاملرنې مننه وکړه، ويې ویل، ټاپي پروژه د ترکمنستان جمهور رئیس ته هم ځانګړی ارزښت لري.
هغه زیاته کړه، ټاپي پروژه د سیمې له لویو پروژو څخه یو مهم اقتصادي دهلېز دی چې په بېلابېلو برخو کې به د اقتصادي ودې او ټولنیز ثبات لامل شي.
ده څرګنده کړه، د ټاپي پروژې مقدماتي کارونه او انجنیري اسناد ترسره شوي او په دې پروژه کې دخیل هېوادونه په ځانګړي ډول ترکمنستان د دې پروژې تطبیق او بشپړولو ته ژمن دي.
هغه همدارنګه وویل، ډېرو ملي او بین المللي شرکتونو د ټاپي پروژې د تطبیق په برخه کې د ونډې لپاره لېوالتیا ښودلې ده.
مراد امانوف زياتوي، د ټاپي پروژې موخه دا ده چې د ترکمنستان ۳۳ میلیارد متر مکعب ګاز له ترکمنستان څخه افغانستان او د پاکستان له لارې هند ته انتقال شي.
د نوموړي په وينا، د ټاپي پروژې په مالي برخه کې د مشورې په حال کې دي، چې هر اړخیزې ارزونې ترسره او راتلونکې ستونزې پیش بیني شي.
امانوف زیاته کړه، د دې پروژې د ښېګڼو په اړه دې د خلکو پوهاوی زیات شي، تر څو ټول د دې په ارزښت پوه شي.
د يادولو ده، چې په ارګ کې په دې مناسبت جوړو شویو مراسمو کې د اجرائیه ریاست دویم مرستیال حاجي محمد محقق، د مشرانو جرګې رئیس فضل هادي مسلمیار، د جمهوري ریاست یو شمېر سلاکارانو ، د کابینې غړو او په افغانستان کې د ترکمنستان، هند او د پاکستان استوګن سفیرانو او د ټاپي لمېټډ شرکت عامل رئیس هم حضور درلود.
غړيYou need to subscribe to view the full article. Please login or register a new account.
