پل علم (پژواک، ٢٣ زمرى ٩٦): د لوګر په څرخ ولسوالۍ کې د ملي امنيت ځواکونو ٧٩٠ کيلوګرامه تارياک نيولي دي.
د لوګر د والي وياند ميراحمد سېلاب د زمري په ٢٣مه پژواک خبري اژانس ته وويل چې د ملي امنيت ځواکونو تېره شپه په څرخ ولسوالۍ کې عمليات کړي دي.
د هغه د معلوماتو له مخې، د دغو عملياتو پر مهال يادو ځواکونو ٧٩٠ کيلوګرامه تارياک چې په يوه ډاډسن موټر کې بار وو، نيولي دي.
سېلاب زياتوي چې د دغو ترياکو د انتقال په تور څوک نه دي نيول شوي؛ ځکه لېږدوونکي يې په تېښته بريالي شوي دي.
د هغه په وينا، يادو کسانو دغه توکي له ختيځو ولايتونو راوړي وو او غوښتل يې چې د ازرې او څرخ له لارې يې د هېواد سوېلي ولايتونو ته انتقال کړي.
دغه راز د لوګر د ولايتي شورا غړي حسيب الله ستانکزي پژواک ته وويل چې په دې وروستيو کې لوګر د نشه يي توکو د ترانزيت پر لار بدل شوى دى.
د هغه د معلوماتو له مخې، هر کال له لغمان، ننګرهار او کونړ ولايتونو زرګونه کيلوګرامه نشه يي توکي د لوګر له لارې نورو ولايتونو ته وړل کېږي.
ده وويل: ((په لوګر کې نشه يي توکي نه کرل کېږي خو دغه انتقال د دې باعث شوى چې يو شمېر کسان معتاد شي.))
ستانکزى وايي چې کله نا کله امنيتي ځواکونه پر دې توانېږي چې نشه يي توکي کشف او ترلاسه کړي.
د لوګر د حکومتي چارواکو د معلوماتو له مخې، د روان کال له پيله تر اوسه ٢٨٠٠ کيلوګرامه بېلابېل ډوله نشه يي توکي په دغه ولايت کې نيول شوي دي.
غړيYou need to subscribe to view the full article. Please login or register a new account.
