جلال اباد (پژواک، ۸ وږی ۹۶): د لغمان له مرکز مهترلام څخه بادپښ ولسوالۍ ته د سړک پخولو چارې پيل شوې.
دغه سړک پر دوو برخو وېشل شوی چې د لومړۍ برخې کار يې د وږي په ۸مه د فوايد عامې د وزير له لورې پرانيستل شو او د دويمې برخې لپاره يې د قرارداد پروسه په ملي تدارکاتو کمېسيون کې تر غور لاندې ده.
د فوايد عامې سرپرست وزير يما ياري چې نن يې لغمان ولايت ته سفر کړی و، د مهترلام ښار او بادپښ ولسوالۍ تر منځ غځېدلي سړک د پخولو چارې پیل کړې.
هغه وويل چې له مهترلام ښار څخه بادپښ ولسوالۍ ته تللی سړک پر دوو برخو وېشل شوی چې د يوې برخې کار يې پيل شو او بل به يې هم په نږدې راتلونکي کې پيل شي.
د وزير د معلوماتو له مخې، د سړک لومړۍ برخه ۲۰،۶ کيلومتره ده چې د ۳۲۰ ميليونه افغانيو په لګښت به ورغول شي او چارې به يې د H.O شرکت له لوري په ۱۴ مياشتو کې بشپړې شي.
نوموړي د دغه سړک د دويمې برخې په تړاو وويل: ((د دغه سړک دويمه برخه ۲۴ کيلومتره ده چې د هغه د قرارداد پروسه په تدارکاتو کمېسيون کې تر غور لاندې ده او انشاءالله ډېر ژر به يې موږ د افتتاح شاهد يو.))
د لغمان والي عبدالجبار نعيمي وويل چې د ياد سړک د چارو د کيفيت پوره څارنه به کوي.
ده پر خلکو هم غږ وکړ چې په خپلو ساحو کې دې د ياد سړک له چارو نظارت وکړي.
هغه د سړک د رغوونکي شرکت پر مسولينو هم ټينګار وکړ، چې د سړک جوړولو په چارو کې له پوره دقته کار واخلي او هغه شان سړک ورغوي چې په قرارداد کې ذکر شوی دی.
د ياد شرکت مسوول انجنير حسين وويل چې سړک به د قرارداد له ذکر شوو مواردو سره سم رغوي او زياته يې کړه په دې برخه کې د کيفيت احسان ځکه پر چا نه کوو چې په همدې شکل يې قرارداد کړی دی.
د بادپښ ولسوالۍ اوسېدونکي خوښ دي چې سيمې ته يې تللې لاره قير کېږي خو غوښتنه کوي چې د سړک جوړېدو چارې د قرارداد له نېټې سره يو شان سرته ورسېږي.
د سيمې يو قومي مشر ملک اول ګل خوښي وښوده چې حکومت يې ستونزې واورېدې او د دوی سيمې ته غځېدلې لارې قير کول يې پيل کړل.
نوموړي وويل، اوس ورته د تګ راتګ پر مهال ډېرې ستونزې دي او حتی کله نا کله خو ځيني ناروغان روغتون ته په لاره ساه ورکړي.
د يادولو ده، په دې وروستيو کې په لغمان کې د رغنيزو پروژو د پرانيستل کېدو خبرونه ډېر ورکول کېږي چې په تېرو څو ورځو کې دا دويم وزير دی چې دغه ولايت ته د رغنيزو چارو د پرانيستې په موخه سفر کوي.
غړيYou need to subscribe to view the full article. Please login or register a new account.
