جلال اباد (پژواک، ۱۲ سلواغه ۹۶): د ننګرهار د کډوالو چارو رياست لپاره د ۲۱ ميليونه افغانيو په ارزښت د نوې اداري ودانۍ د جوړېدو چارې پيل شوې.
دغه ودانۍ چې په درېيو پوړونو کې به په اساسي ډول جوړه شي، د سلواغې په ۱۲مه يې د ننګرهار والي له لوري د پټۍ په پرېکولو کار پيل شو.
د ننګرهار د کډوالو چارو رييس غلام حيدر فقيرزي د يادې ودانۍ د کار د پيل په مراسمو کې پژواک ته وويل چې د ودانۍ جوړېدو چارې به دوولس مياشتې دوام وکړي.
د نوموړي په وينا، ياده ودانۍ په درېیو پوړونو کې په اساسي او عصري بڼه جوړېږي چې د تحکيم ثبات برنامې ۲۱ میليونه افغانۍ لګښت پرې راځي.
هغه زياته کړه: ((دا ودانۍ چې ۱۸ اداري خونې لري، يو کنفرانس روم لري، کډوالو ته د موادو د توزيع يو حال او د مراجعينو لپاره يوه انتظارګاه هم په کې په نظر کې نيول شوې ده.))
د ننګرهار والي محمدګلاب منګل وويل چې د دغه ولايت د کډوالو چارو رياست په ټول هېواد کې لومړنی ریاست دی چې د ودانۍ د جوړېدو کار یې پيلېږي.
ده د يادې ودانۍ د کار د څارنې په تړاو وويل: ((موږ د څارنې يو ټېم لرو چې وخت په وخت به د دې ودانۍ د چارو نظارت کوي او رياست به هم خپله د دغو چارو د کيفيت او کميت څارنه کوي.))
د ننګرهار والي د يادې ودانۍ پر جوړوونکي شرکت هم غږ وکړ چې د ودانۍ د کارونو کيفيت او ښه والي ته دې پاملرنه وکړي او که يې کومه ستونزه په کار کې وليدل شي، نو قانوني چلند به ورسره وکړي.
د يادولو ده، د ننګرهار د کډوالو چارو رياست اوسمهال په يوه کرايه کور کې خپلې چارې ترسره کوي چې هر کال په لکونو افغانۍ کرايه ورکوي.
غړيYou need to subscribe to view the full article. Please login or register a new account.
