د “دهانه تور” د ډبرو سکرو کان لاره پرانېستل شوه

<p>ايبک (پژواک، ١٤ سلواغه ٩٦): د سمنګان ولايت له دره صوف بالا ولسوالۍ څخه بلخ ولايت ته د "دهانه تور" د ډبرو سکرو کان  لار چې د وروستيو واورو ورېدو له امله تړل شوې وه؛ پرانېستل شوه.</p>

<p>د سمنګان ولايت د دره صوف بالا ولسوال احمدعلي حسني د ياد مطلب د څرګندولو ترڅنګ وويل، چې د يادې ولسوالۍ د "شباشک" د ډبرو سکرو کان لاره لا هم تړلې ده.</p>

<p>هغه زياته کړه، د دهانه تور د سکرو کان لار د سيمې خلکو او موټر چلوونکو پاکه کړې؛ خو د شباشک کان لار د لارو سختوالي له امله لا هم تړلې پاتې ده.</p>

<p>هغه پژواک خبري اژانس ته وويل، يادې لارې شپږ ورځې وړاندې د ترافيکو پر مخ تړل شوې وه.</p>

<p>دغه کانونه د هېواد په کچه د ډبرو سکرو ستر کانونه دي. چارواکي وايي چې له يادو کانونو هره ورځ د ډبرو سکرو ١٢٠ موټر باريږي.</p>