منځپانګې ته تلل
دوشنبه ۱۶ نومبر ۲۰۲۶ · کابل ۷:۰۹ غ.م
۱° — په ټولو ولایتونو کې هوا
صاف · ↑۱۴° ↓۱°
د هوا کیفیت: منځنی
غړي

حديد: د بلخ نوي چارواکي بايد امنيت او فساد ضد مبارزې ته لومړيتوب ورکړي

· ۳ دقیقې لوستل · ۱۶۳ کتنې

مزارشريف (پژواک، ۷ وری ۹۷): مدني فعالان وايي چې په بلخ ولايت کې له نوو بدلونونو سره خلک خوښ دي خو دا لا معلومه نه ده چې نوي چارواکي به هغه روڼتيا رامنځته کړي چې خلک يې تمه لري.

بلخوا د بلخ ولايتي شورا رييس وايي چې د دغه ولايت نوي دولتي او امنيتي چارواکي بايد په خپلو چارو کې د امنيت ټينګښت او له اداري فساد سره مبارزې ته لومړيتوب ورکړي.

له نږدې څلور مياشتني سياسي مخالفت او ناندريو وروسته عطامحمد نور د بلخ ولايت مقام څوکۍ په دې شرط پرېښوده چې د دغه ولايت نوی والي او امنيه قوماندان به د ده په خوښه ټاکل کېږي.

ارګ ورسره د دغه او د نوموړي د ځينو نورو غوښتنو پر منلو هو وکړه.

د نوي کال په دويمه ورځ محمد اسحق رهګذر د بلخ والي او محمد اکرم سامع د دغه ولايت د امنيه قوماندان په توګه دندې پيل کړې.

د بلخ مدني فعالان وايي چې که څه هم نوو تشکيلاتي بدلونونو د سياسي مخالفتونو د له منځه تلو په پار د خلکو اندېښنې کمې کړې دي خو لا هم ستونزې شته دي.

په دغه ولايت کې د مدني ټولنو اتحاديې مشر استاد حميد صفوت پژواک خبري اژانس ته وويل چې لا هم خلک په دولتي چارو کې د روڼتيا په تمه دي.

نوموړي زياته کړه چې د دولتي چارواکو د کړنو او د ولس د باور تر منځ لا هم واټن شته چې بايد نوي چارواکي يې د له منځه وړلو هڅه وکړي.

د هغه په وينا، په بلخ ولايت کې د خپلسرو وسله والو ګرځېدل او په وېره کې ژوند کول د مزارشريف ښار د خلکو عادت ګرځېدلی دی.

صفوت وويل چې د بلخ چارواکي لا هم په رڼه توګه ولس ته له حساب ورکولو ډډه کوي چې بايد رامخې ته شي.

نوموړي زياته کړه، لا هم باوري نه دی چې نوي چارواکي به دغه دندې په سمه توګه ترسره کړای شي او که نه.

بلخوا د ولايتي شورا رييس ډاکتر محمد افضل حديد هم نوو دولتي او امنيتي چارواکو ته سپارښتنې کوي.

نوموړي پژواک ته وويل چې نوو بدلونونو خلک خوشحاله کړي خو دا خوښي د ښه ژوند تمه ده چې ولس يې حق لري.

د هغه په وينا، په بلخ ولايت کې نا امني، اداري فساد او له دولتي دندو ناوړه ګټه ا خيستل سترې ستونزې دي.

حديد وويل، نوي چارواکي مسووليت لري چې د همدې چارو پر وړاندې جدي هڅې وکړي.

د بلخ ولايت دولتي او امنيتي چارواکي د قانون په رڼا کې د چارو د ترسره کېدو ژمنه کوي.

د بلخ والي اسحق رهګذر وايي چې ولسمشر پرې د بلخ خلکو ته د خدمت کولو باور کړی او هېڅکله به دغه باور زيانمن نه کړي.

نوموړي چې تر معرفي کېدو وروسته يې وينا کوله، زياته کړه چې دی د کوم قوم، ګوند او ډلې والي نه، بلکې د بلخ د خلکو والي دی او د قانون په رڼا کې به د هرې ستونزې د حل کوښښ کوي.

امنيه قوماندان محمد اکرم سامع بيا د امنيتي ځواکونو او ولس تر منځ د واټن کمېدو کار خپل لومړيتوب بولي.

نوموړي زياته کړې چې د قانون په رڼا کې به د خپلسريو مخه ونيسي او پر امنيتي مسوولينو به له همدې لارو د خلکو د باور زياتېدو هڅه کوي.

بلخ هغه مهال له سياسي کشالې سره مخ شو چې کله عطامحمد نور د ولسمشر د هغه فرمان پر وړاندې د مخالفت غږ پورته کړی چې د ده استعفا په کې منل شوې وه.

دغه مخالفت کابو څلور مياشتې وخت ونيو چې له امله يې د بلخ امنيتي حالت هم کړکېچن شو او د خلکو اندېښنې ورسره ډېرې شوې.

غړي

You need to subscribe to view the full article. Please login or register a new account.

اړوند خبرونه

ټول دولت او سياست