تالقان (پژواک، ١٠ غبرګولى ٩٧) : د تخار دشت کلا ولسوالۍ چې تېره ورځ دوه بجې طالبانو نیولې وه له څو ساعتونو وروسته بېرته د امنیتي ځواکونو لاسته ورغله.
د تخار د امنيه قوماندانۍ وياند سمونیار عبدالخلیل اسير د غبرګولي په ١٠مه، پژواک خبري اژانس ته وویل چې سیمې ته د مرستندويه امنیتي ځواکونو له را رسېدو سره سم یاده ولسوالۍ يې بېرته و نيوله.
اسیر وايي چې طالبان بېرته خپلو پخوانیو سیمو ته په شا تمبول شوي دي.
د نوموړي په وينا، په دغه اته ساعته جګړه کې پنځه امنیتي سرتېري وژل شوي، درې ټپيان دي او د قوماندان ضابط علم په ګډون لس پاڅون کوونکي طالبانو نيولي دي.
د هغه په خبره چې په جګړه کې شلو طالبانو ته هم مرګ ژوبله اوښتې ده. خو طالبانو دولت ته د لاډېرو تلفاتو او زیانونو اړولو ادعا کړې ده.
د سیمې يوه اوسېدونکي شرافت پژواک خبري اژانس ته وویل چې طالبان د ولسوالۍ امنیه قوماندانۍ او د ملي امنيت ودانۍ له سوځولو وروسته له ښاره ووتل.
نوموړی وايي چې اوس مهال طالبان د امو سيند پر غاړه ځنګلونو کې دي.
د هغه په وينا، که امنيتي ځواکونه خپلو عملیاتو ته دوام ور نه کړي او دغه ولسوالۍ په بشپړه توګه د طالبانو له شتونه پاکه نه کړي شونې ده چې دغه ډله بېرته خپلو خوځښتونو ته دوام ورکړي.
خو د تخار امنيتي چارواکي وايي چې پیل شوي عمليات به ددغې ولسوالۍ تر بشپړه پاکېدو پورې دوام وکړي .
وسله والو طالبانو پرون ددې ولسوالۍ د نيولو خبر ورکړى و، خو د بېرته پرېښودلو په اړه يې تر اوسه څه نه دي ويلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن