منځپانګې ته تلل
شنبه ۲۱ نومبر ۲۰۲۶ · کابل ۱۰:۱۱ غ.م
۱۰°ورېځ · ↑۱۴° ↓۳°د هوا کیفیت: منځنی
غړي

د خوست پر زرګونو هکتاره ځمکه د جلغوزيو او چهارمغزو نيالګي ايښودل کېږي

· ۴ دقیقې لوستل · ۲۱۳ کتنې

خوست ښار (پژواک، ٦چنګاښ ۹۷): د خوست والي وايي چې په راتلونکو دريېو کلونو کې به ددې ولايت په بېلابېلو ولسواليوکې پر ۸۲۵۰ هکتاره ځمکه د جلغوزيو او غوزانو (چهارمغزو) نيالګي کېښودل شي.

د خوست والي حکم خان حبيبي له پژواک اژانس سره په ځانګړې مرکه کې وويل چې د پلان له مخې لومړی ۶،۶ ميليونه د جلغوزيو او چهارمغزو نيالګي توليدوي او بيا به د ځنګل لرونکو ولسواليو پر اوسېدونکو ووېشل او بيا کېښودل شي.

د نوموړي په وينا، دغه نيالګي به د تڼيو، سپېرې، موسی خېل، ځاځي ميدان او قلندر ولسواليو اړوند پر ۸۲۵۰ هکتاره ځمکه چې لومړی به د انجنيرانو له لوري سروې شي، کېښودل شي.

والي زياتوي: ((د همدې لپاره په ۲۲۰ جريبه ځمکه کې د نيالګيو ۱۱۰۰ قوريې جوړېږي او په دريېو کلونو کې به ۶.۶ ميليونه نيالګي توليد شي چې نيمايي به جلغوزي او نيم به يې چهارمغز وي.))

هغه وويل، دا د افغان دولت له هغو هڅو څخه يوه ده چې غواړي د افغانستان ځنګلونه تر ممکنه بريده بياورغوي، ځکه چې ځنګلونه له سترو طبيعي پانګو او مالي سرچينو څخه ګڼل کېږي.

والي وايي چې د يادې پروژې د پلې کېدو لپاره د کرنې او مالدارۍ وزارت له لوري ۳.۶ ميليونه ډالر ځانګړي شوي او له امله به يې شاوخوا ۸ زره کسانو ته په کې د کار زمينه هم برابره شي.

حکم خان حبيبي همدارنګه وويل چې په دې سره به نه يواځې د چهار مغز او جلغوزيو محصولات ډېر شي، بلکې په چاپېريال ساتنه کې به هم مهمه ونډه ولري.

نوموړي امنيتي ارګانونو ته سپارښتنه وکړه چې نه يواځې د بيارغېدونکوځنګلونوساتنه وکړي، بلکې هغه کسان هم ونيسي چې همدا اوس پر ځنګل وهنه بوخت دي.

حبيبي وويل: ((امنيتي نهادونو ته مې جدي هدايت دا دی چې د قوانينو په رڼا کې د هرهغه عمل مخه ونيسي چې چاپېريال ته زيان رسوي. ويې نيسئ، د قانون منګولو ته يې وسپارئ او محاکمه يې کړئ.))

په ورته وخت کې د خوست د کرنې او مالدارۍ رييس انجنير سميع الله نصرت پژواک اژانس ته وويل، په طبيعي ډول د خوست، پکتيا او پکتيکا ولايتونو غرونه د جلغوزيو او چهارمغزو د ودې او حاصل لپاره ډېر مناسب جوړ شوي.

د نوموړي په وينا، د جلغوزيو او چهارمغزو پر ګټو خلک پوهېدلي او د بيارغونې يې ډېره لېوالتيا لري، ځکه د دې ولايتونو يو شمېر خلک د جلغوزيو او چهارمغزو له حاصلاتو ډېرې پيسې ترلاسه کوي.

ده زياته کړه: ((موږ په نادرشاه کوټ ولسوالۍ کې همدا اوس يوه قوريه جوړه کړې چې ۱۰ زره نيالګي مو په کې روزلي، خو نورو ځايونو ته مو انتقال کړي چې پايله يې سره له اوسه ګټوره ښکاري.))

انجنير نصرت دغه راز وويل، د کرنې او مالدارۍ وزارت په چوکاټ کې د جلغوزيو او چهارمغزو ځنګلونو د بيا احيا لپاره به هلې ځلې نورې هم چټکې کړي.

د خوست سپېره، تڼي، دوه منده، قلندر، موسی خېل او ځاځي ميدان د هېواد له ډېرو ښو ځنګلي ولسواليو څخه ګڼل کېدې، خو په تېرو څلورو لسيزو کې د دې ولسواليو د ځنګلونو زياته سلنه ونې  وهل شوې دي.

ددې ولسواليو اوسېدونکي وايي، پرته له دې چې دولت يې لاسنيوی وکړي، په ډېرو سيمو کې يې د چهارمغز او جلغوزيو له ځنګلونو څخه نه يواځې ساتنه کړې، بلکې د بيارغونې په برخه کې يې هم ډېر کار کړی دی.

د دې ولايت يو اوسېدونکي عمرخان پژواک اژانس ته وويل چې د دولت په همکارۍ سره به سربېره پر دې چې دا ملي پانګه له وهل کېدو وژغورل شي، د سيمې د خلکو پر اقتصاد هم مثبت اغېز کوي.

عمرخان وويل: ((په دې سره به ډېر خلک مصروف شي، د خلکو اقتصاد به وده وکړي. د دې ونو په ايښودلوسره به زموږ چاپېريال خوندي او خلکو ته به دا ذهنيت هم ورکړي چې ونې کېنوي.))

په ټوليز ډول لويه پکتيا د هېواد او سيمې په کچه د جلغوزيو او چهارمغزو پراخ ځنګلونه لري چې د سيمې خلک ترې هر کال شاوخوا ۵ زره ټنه جلغوزي راټولوي او نړيوالو مارکېټونو ته يې صادروي.

په دې وروستيو کلونو کې هرکال د خوست له مارکېټ څخه شاوخوا ۴ زره ټنه جلغوزي د پاکستان له لارې چين او ځينو نورو هېوادونو ته صادر شوي چې ټوليز قيمت يې شاوخوا ۱۰۰ ميليونه ډالر ښودل شوی دی.

ددې ترڅنګ څه موده وړاندې ولسمشر محمداشرف غني د خوست، پکتيا او پکتيکا له واليانو او يو شمېر سوداګرو سره په ناست کې ددې درېيو ولايتونو د جلغوزيو د صادراتو پر مديريت ټينګار کړی و.

نوموړي ويلي و چې که د يادو ولايتونو جلغوزي په سمه توګه مديريت او له قانوني لارو بهر ته صادر شي، د هېواد د نورو ټولو ولايتونو په پرتله له جلغوزيو څخه زيات عوايد ترلاسه کېدای شي.

 

غړي

You need to subscribe to view the full article. Please login or register a new account.

اړوند خبرونه

ټول فيچرونه