کندهار (پژواک، ۵ تله ۹۷): د اطلاعاتو او فرهنګ وزارت د لرغونپوهنې ادارې په کندهار کې د نارنج ماڼۍ د کیندنې چارې پيل کړې.
په دغې تاریخي ماڼۍ کې چې لرغونتیا یې له ۲۳۰۰ کلونو اوړي، د کېندنې چارې د تاریخي ابداتو د څېړنې په موخه ترسره کېږي.
د دغه کار د پيلولو په مراسمو کې د اطلاعاتو او فرهنګ وزارت مرستيال پوهاند رسول باوري، د ولایت مقام مرستیال عبدالحنان منیب، د کندهار د اطلاعاتو او فرهنګ سرپرست فضل الباري بريالي او څو نورو چارواکو ګډون کړی و.
د اطلاعاتو فرهنګ وزارت مرستيال پوهاند محمد رسول باوري پژواک خبري اژانس ته وویل، د دغې تاریخي ماڼۍ د کېندنې چارې د لومړي ځل لپاره ۵۵ کاله وړاندې پیل شوې وې چې بیا د جګړو او ناخوالو له امله درېدلې وې.
هغه زیاته کړه، دا دی پنځه پنځوس کاله وروسته یو ځل بیا د دغې تاریخي ماڼۍ د مسلکي او فني کېندنې چارې د لرغونپوهنې ادارې په مرسته پيلوي چې درې کاله به دوام وکړي.
دی وايي، په دې موده کې به ګڼ شمېرتاریخي اثار تر لاسه او د تاریخي ابداتو څېړنه به ترسره شي.
د کندهار د والي مرستیال عبدالحنان منیب وویل، د نارنج ماڼۍ د تاریخي ابداتو کېندل د افغانستان د تاریخ ثابتولو لپاره یوه لویه لاسته راوړنه ده.
هغه زیاته کړه، د دغې ماڼۍ د کېندنې د چارو د ښه تر سره کېدو په موخه به ولایتي اداره هراړخیزه مرسته کوي.
د کندهار د اطلاعاتو او فرهنګ سرپرست د نارنج ماڼۍ کېندنه یوه مهمه او تاریخ سازه پروژه یاده کړه.
هغه پژواک ته وویل، دا پروژه چې څو کاله دوام کوي، د کېندنې په ترڅ کې به یې ډېر داسې اثار په لاس راشي چې د کندهار پېژندنې لپاره مهم دي.
نارنج ماڼۍ د کندهار د زاړه ښار په څنډه کې ۲۳۴۰ کاله وړاندې د مقدوني اسکندر د امپراطورۍ پر مهال ودانه شوې ده چې هغه مهال پوځي اډه وه.
د تاریخ په حواله، هغه وخت چې مقدوني سکندر له يونان څخه راغی، په ټول هېواد کې يې دوولس دا ډول ماڼۍ جوړې کړې چې د (سکندريه ماڼيو) په نوم يادېدلې، نورې يوولس دا ډول تاريخي ماڼۍ په بشپړه توګه له منځه تللي، خو يواځې (نارنج) ماڼۍ پاتې ده.
نارنج ماڼۍ د هېواد تېرو ناخوالو ورانه کړې او دا مهال يې يواځې د خاورو يوه غونډۍ تر سترګو کېږي.
د ماڼۍ دننه اوس هم خورا تاريخي او باارزښته اثار تر خاورو لاندې دي چې یوه اندازه یې د جګړې په کلونو کې قاچاق شوي هم دي.
دغه راز په تېرو لسو کلونو کې د نارنج ماڼۍ ډېرې ځمکې د زورواکانو له لوري غصب شوې، خاوره يې وړل شوې او زيات تاريخي اثار یې په غير فني او غیر قانوني ډول ايستل شوي او بهرنيو هېوادونو ته قاچاق شوي دي.
دغه راز په کندهار ښار کې د تاریخي زاړه جامع جومات د ترمیم چارې هم پيل شوې دي.
د اطلاعاتو او فرهنګ وزارت مرستيال پوهاند محمد رسول باوري وویل، زوړ جامع جومات د کندهار ښار یو د لومړیو او پخوانیو جوماتونو څخه دی چې ډېر تاریخي ارزښت لري.
هغه زیاته کړه، کله چې احمدشاه بابا له بخارا څخه خرقه مطهره کندهار ته راوړله، نو لومړی يې په دغه جامع جومات کې وساتله.
د ده په خبره، له همدې امله دغه جامع جومات تاريخي ارزښت لري او پر ټولو کندهاريانو يې غږ وکړ چې په ساتلو کې يې هڅه وکړي.
د والي مرستيال عبدالحنان منیب وويل، د زاړه جامع جومات د ترمیم چارې به په یوه کال کې د ۱۱،۹ ميليونه افغانيو په ارزښت بشپړې شي.
نوموړيد اړوند ساختماني شرکت له مسوولينو وغوښتل چې له شرطنامې سره سم دې د دغه جومات د ترمیم چارې په ښه توګه بشپړې کړي .
غړيYou need to subscribe to view the full article. Please login or register a new account.
