کندهار (پژواک، ۱۰ تله ۹۷): د کندهار والي د څو تنو چارواکو په ملتیا تخته پل او سپين بولدک ولسوالیو ته سفر وکړ او د دوو لویو پروژو چارې یې پرانیستې.
دغه دوې پروژې د کندهار- سپین بولدک او سپین بولدک- ښوراوک سړکونو دي چې په پاخه او اساسي ډول جوړېږي.
د دغو سړکونو د چارو د پيل په مراسمو کې د کندهار د والي زلمي ویسا تر څنګ، امنیتي چارواکو، د ولایتي شورا غړو، د یو شمېر ولسوالیو ولسوالانو او قومي مشرانو ګډن کړی وو.
د کندهار والي زلمي ویسا وویل، د کندهار- سپین بولدک د اوسني سړک تر څنګ به په موازي توګه د ۸۰ کیلومتره بل سړک جوړولو چارې تر راتلونکو دوو کلونو بشپړې شي.
هغه زیاته کړه، دغه سړک به په دوه طرفه بڼه په نړیوال معیار جوړ شي چې کورنۍ او بهرنۍ سوداګري به ورسره وغوړېږي او خلکو ته به ډېرې اسانتیاوې برابرې شي.
دی وايي، د دغه سړک په دوو برخو کې جلا جلا شرکتونو ته په قرارداد ورکړل شوی چې ۴۰ کیلومتره یې یوه شرکت ته په ۱،۲۵ میلیارده افغانۍ او ۴۰ کیلومتره نور یې بل شرکت ته په ۱،۳۳ میلیارده افغانۍ ورکړل شوی دی.
هغه وویل، د دغه سړک جوړولو لګښت د ټولګټو وزارت له بودیجې ورکول کېږي.
دغه راز د کندهار والي د سپين بولدک- ښوراوک سړک د جوړولو چارې هم پرانیستلې.
نوموړي وویل، دغه سړک چې ۹۳ کیلومتره اوږدوالی لري، په څلورو برخو کې څلورو جلا جلا شرکتونو ته په قرارداد ورکړل شوی او هر شرکت د دغه سړک د ۲۴ کیلومتره برخې د جوړولو مسوولیت لري.
ده زیاته کړه، د دغه سړک پر جوړولو ۷۵ میلیونه ډالر لګښت راځي چې د نړیوال بانک له خوا ورکول کېږي.
ویسا یادونه وکړه چې د دغو دواړو سړکونو له جوړېدو سره کورنۍ او بهرنۍ سوداګري وده کوي، د صادراتو او وارداتو په برخه کې سوداګرو ته اسانتیاوې برابروي او د سیمې د خلکو ترانسپورتي او ټولنیزې ستونزې هم حلوي.
د کندهار اوسېدونکي په معیاري بڼه د دغو سړکونو پر جوړولو خوښ دي او له اړوندو ارګانونو غوښتنه کوي چې د کار څارنه وکړي، څو په لوړ کیفیت یې د جوړولو چارې بشپړې شي.
د کندهار د ولایتي شورا غړي حاجي نعمت الله شېردلي پژواک خبري اژانس ته وویل، سپین بولدک ولسوالي د ټول هېواد د سوداګرۍ لپاره مهمه ده، ځکه له پاکستان او نورې نړۍ سره ډېره برخه صادرات او واردات له همدې لارې کېږي.
ده زیاته کړه، د دې لارې په جوړولو سره اوسنی واټن لنډ شي، ترافیکي پیښې به کمې شي او د امنیت د خوندیتوب چارې به یې هم اسانه شي.
د یادونې ده چې د همدې سړک په امتداد له کندهار ښار څخه تر کندهار هوايي ډګر پورې د ۱۶،۵ کیلومتره سړک د جوړولو چارې بشپړې شوي چې رسماً لا نه دی پرانیستل شوی.
د دغه سړک پر جوړولو ۴۰ میلیونه ډالر لګښت راغلی چې په نړیوال سټنډرډ جوړ شوی او د تګ راتګ ۶ کرښې لارې چې عرض یې ۷۰ مترو ته رسېږي.
دغه راز د کندهار والي په تخته پل ولسوالۍ کې د ۴ میلیونه افغانیو په ارزښت د لمریزې برېښنا چارې هم پرانیستې.
په دغه مراسمو کې د کندهار د کليو او پراختيا رییس محمدنسيم ايوبي وويل، د لمریزې برېښنا دغه پروژه د دغې ولسوالۍ د حاجي شېر کاکا په کلي کې د اړوند ریاست د ولسي تړون د پروګرام له خوا پلې کېږي چې په دریو میاشتو کې به ګټې اخیستنې ته وړاندې شي.
ده زیاته کړه، دغه پروژه ۷۸ کورنیو ته ۱۱ کیلو واټه برېښنا چمتو کوي چې په ترڅ کې یې ۷۷۴ کسانو ته د کار زمینه هم برابرېږي.
د کندهار والي زلمي ویسا وویل که خلک له دغې پروژې ښه ساتنه وکړي، نو د ولسي تړون پروګرام له خوا به ورته نورې لویې پروژې هم پلي شي څو د خلکو په ژوند کې بنسټیز بدلون راولي.
غړيYou need to subscribe to view the full article. Please login or register a new account.
