کندهار (پژواک، ۱۶ تله ۹۷): په کندهار کې د لومړي ځل لپاره د کرنیزو محصولاتو د کیفیت د کتنې او نړیوال سرټیفیکټ ورکولو مرکز جوړېږي چې په دې توګه به بهر ته د مېوو او نورو کرنیزو محصولاتو لېږد معیاري شي.
د دغه مرکز لپاره په کندهار صنعتي پارک کې ۱۵ جریبه ځمکه ځانګړې شوې چې نن یې د تخنیکي سروې چارې پیل شوې.
په دغو مراسمو کې له کرنې وزارت څخه راغلي پلاوي، د ولایت مقام مرستیال عبدالحنان منیب او یو شمېر سوداګرو ګډون کړی وو.
منیب پژواک خبري اژانس ته وویل، کندهار د هېواد په کچه کرنیز ولایت دی چې وچه او تازه مېوه یې ښه شهرت لري او په پراخه کچه بهر ته صادرېږي.
دی وايي، په همدې بنسټ په کندهار کې دغسې یوه مرکز ته اړتیا لیدل کېده څو د مېوو او کرنیزو توکو کیفیت په کې وکتل شي او د نړیوال سرټیفیکيټ په لرلو بهر ته صادر شي.
د ده په خبره، په دې توګه به د کندهار کرنیز محصولات او مېوې په بهرنیو مارکېټونو کې خپل اعتبار او باور ډېر کړي او لا ښه بازار به پیدا کړي چې د هېواد په اقتصادي وده کې مهم رول لوبوي.
د کرنې له وزارت څخه د راغلي پلاوي مشر شاه محمد حمیدي وویل، په کندهار کې به د کرنیزو محصولاتو د کیفیت د کتنې او نړیوال سرټیفیکيټ ورکولو مرکز په جوړېدو سره د کرنیزو محصولاتو او مېوو سوداګري معیاري شي او وده به وکړي.
هغه زیاته کړه، دغه مرکز د نړيوالو بانک په مالي لګښت د کرنې، اوبو لګولو او مالدارۍ وزارت په چوکاټ کې جوړېږي.
ده یادونه وکړه چې اوسمهال د افغانستان مېوې په نړيوالو بازارونو کې د نورو هېوادونو په نښه او نوم پلورل کېږي، خو له دې وروسته به په خپل نوم او نښه نړیوالو مارکېټونو ته وړاندې شي.
هغه خبر ورکړ چې ورته مرکزونه به په کابل او هرات کې هم جوړ او ګټې اخیستنې ته وړاندې شي.
د کندهار د کرنې رییس سید حفیظ الله سیدي هم په دې ولایت کې د دغه مرکز جوړولو د کرنیزو محصولاتو د سوداګرۍ په وده کې مهم وباله.
ده وویل، دا به په ټولو پرمختللو وسایلو سمبال مرکز وي چې پر جوړېدو یې ښايي له ۵ تر ۶ سوه زره ډالر ولګول شي.
په کندهار کې د وچې او تازه مېوې سوداګر هم په دې ولایت کې د یاد شوي مرکز جوړېدل د صادراتو په برخه کې یو مهم پرمختګ بولي.
د تازه مېوې د سوداګرو د ټولنې مشر حاجي ناني اغا پژواک خبري اژانس ته وویل، بهر ته د مېوو د لېږد پر مهال به سوداګر تل له دې ستونزې سره مخ وو چې د کرنیزو محصولاتو اړوند سرټیفیکيټ به ترې غوښتل کېده.
دی وايي، دغه ستونزه هغه مهال ډېره جدي شوه چې د افغانستان- هند هوايي دهلېز پرانیستل شو او له لارې يې د مېوو لېږد پیل شو.
د ده په خبره، په ټولیزه توګه کومه وچه او تازه مېوه چې له افغانستان څخه هند او یا نورو هېوادونو ته صادرېږي، نو ځانګړي ټیسټونه او سرټیفیکيټونه ته اړتیا لري چې باید تر سره شي.
ده وویل، اوس چې په کندهار کې دغسې یوه مرکز جوړېږي نو هره مېوه به خپل ځانګړی سرټیفیکيټ ولري او دغه لړۍ به معیاري شي.
غړيYou need to subscribe to view the full article. Please login or register a new account.
