د پکتیا ښځې له ښکېلو لورو د جګړې پر ځای سوله غواړي

ګردېز (پژواک، ١٥ ورى ٩٨): د پکتيا ولايت يو شمېر ښځې په نوي کال کې سولې ته هيله منې دي؛ له وسله والو طالبانو او افغان حکومته غواړي چې د تازه جګړې د پيل پر ځای دې د سياسي جوړجاړي لپاره مخامخ خبرې پيل کړي.

دوی دا خبرې په سوله کې د مېرمنو د ونډې په اړه په يوه کنفرانس کې وکړې.

په دې غونډه کې په ټولنيزو او کلتوري چارو کې د پکتيا د والي مرستياله زهرا احمدزۍ له ښځو  وغوښتل چې د هېواد روان ناوړه او جګړه ييز حالت ته په کتو خپل اولادونه وهڅوي چې په ټولنيز ثبات کې ونډه واخلي.

احمدزۍ وويل: ((د افغانستان اصلي وارثين تاسو يئ، دا زامن تاسو لوی کړي، دا مجاهدين، علما، ډاکټران، انجينران او د ملي امنيتي ځواکونو اتلان تاسو لوی کړي، ستاسو په لمنو کې لوی شوي. دوی بايد پر موږ او تاسو باور ولري او موږ ته د تعليم، کار، نکاح، ميراث او نور اسلامي حقونه راکړي.))

د پکتيا پوهنتون استاده ډاکتر نازدانه پکتياوال وايي چې په جګړه کې تر هر چا زيات مېرمنو زيان ليدلی او وسله والو مخالفينو ته په کار ده چې  د خويندو او ميندو ناوړه حالت ته په کتو له جګړې لاس واخلي.

پکتياوال ډاډ څرګندوي چې د طالبانو په تحريک کې هم پخوانۍ سخت دريځي نه ده پاتې او که سوله وکړي، د مېرمنو حقونو ته به درناوی وکړي او د حقونو په تامين کې به يې هڅې کوي.

دا وايي: ((زه په دې يقين لرم که طالبان اوس سوله وکړي، بېرته راشي خپلو کورونو ته او د وطن په ابادۍ کې سهم واخلي، هغه نظر به ورسره نه وي او د ښځو تعليم او کار ته به اجازه ورکړي.))

دغه راز د پکتيا د ښځو چارو رييسه نسرين اورياخېل وايي، د ښځو په ګډون ټول خلک د پردې تر شا د سولې روانو خبرو ته اندېښمن دي او وايي چې د دې خبرو ټول جريان بايد له ولس سره شريک شي.

اورياخېل وويل: ((ښځو ته بايد سهم ورکړل شي، هغه دوه خويندې چې په دې کې له مرکز څخه دي، هغه زما او زما د ولسواليو د خويندو له ستونزو نه دي خبرې. بايد له ولايتونو يا د زون په کچه خويندې وټاکل شي چې په دې کې سهم واخلي. ټول خلک د موقتې ادارې د رامنځته کېدو خبرې ته په تشويش کې دي.))

همدارنګه د پکتيا د ښځو چارو رياست د جندر مسووله مسکا منګل وايي چې د سولې خبرو د ښو مخې ته تګ او د باور فضا ټينګېدو لپاره بايد د هوا په ګرمېدو جګړې پيل نه شي او د سولې روانې خبرې بايد لا زياتې او د افغانانو ترمنځ پيل شي.

منګل پژواک ته وويل چې خلک له جګړې خورا ستړي دي او د خپلو انساني حقونو او ملي ګټو او ارزښتونو په خونديتوب سوله غواړي.

دا وايي: ((هيله ده سوله راشي او دا ناخوالې له منځه لاړې شي. ښځو ته د اسلامي شرايطو په رڼا کې د کار زمينه برابره شي. اسلام مېرمنو ته د کار کولو اجازه ورکړې، لکه سعودي عربستان او ځينو نورو هېوادونو کې چې ښځې کار کوي او په هره برخه کې ونډه اخلي.))

ټاکل شوې ده چې د افغان سولې په تړاو راتلونکې غونډه د اپرېل مياشتې په ١٤ او ١٥مه په قطر هېواد کې ترسره شي چې په دې غونډه کې به افغان سياسي مشران او وسله وال طالبان برخه واخلي.

غړي

You need to subscribe to view the full article. Please login or register a new account.