کندهار ، پل علم (پژواک، ۱۴ غویی ۹۸): د کندهار په سپین بولدک ولسوالۍ کې د پولیسو او وسله والو تر منځ جګړه شوې چې دواړو لورو ته په کې مرګ ژوبله اوښتې ده.
جګړه تېره شپه ناوخته هغه مهال ونښته چې لسګونو وسله والو د دغې ولسوالۍ په بولک نیکه پر پوسته برید وکړ.
د کندهار د والي ویاند عزیز احمد عزیزي پژواک خبري اژانس ته وویل، په دې جګړه کې چې څو ساعته یې دوام وکړ ۱۴ وسله وال وژل شوي او ۷ تنه نور ټپیان شوي دي.
نوموړي دغه راز یادونه وکړه چې په دې جګړه کې ۳ پولیس هم وژل شوي او ۴ نور ټپيان شوي دي.
وسله والو طالبانو تر دې مهاله په دې اړه څه نه دي ویلي.
د هوا له ګرمېدو سره یو ځل بیا په ولسواليو کې د امنیتي ځواکونو پر پوستو د وسله والو بریدونو زور اخیستی دی.
وړمه ورځ د کندهار په خاکرېز ولسوالۍ کې هم د پولیسو او وسله والو تر منځ په نښتو کې دواړو لورو ته مرګ ژوبله اوښتې وه.
په دغه څو ساعته جګړه کې ۱۱ وسله وال وژل شوي او ۹ تنه ټپیان شوي وو، دغه راز ۴ پولیس وژل شوي او ۳ نور ټپیان شوي وو.
د يو بل خبر له مخې، په لوګر ولايت کې د افغان ځواکونو په عملياتو پنځه طالبان له يو شمير وسلو او چاوديدونکو توکو سره نيول شوي دي.
د لوګر دامنيه قوماندانۍ وياند شاپور احمدزي پژواک ته وويل، دغه وسله وال د شمشاد په نامه د عملياتو پر مهال د ولايت د مرکز اړوند پادخواب شانې په سيمه کې نيول شوي.
وسله والو تر اوسه په دې اړه څه نه دي ويلي.
غړيYou need to subscribe to view the full article. Please login or register a new account.
