پلخمري (پژواک،٣٠ لېندۍ ٩٨): د بغلان ولايت ديني عالمانو او د مدرسو طالبانو د يوې غونډې په ترڅ کې د حکومت او وسله والو طالبانو ترمنځ پر اوربند او سولې پر کولو ټينګار وکړ.
دغه غونډه نن په مرکز پلخمري کې جوړه شوې وه چې لسګونو ديني عالمانو او د مدرسو طالبانو په کې برخه اخيستې وه.
په ياده غونډه کې د اهل تشيع ديني عالمانو شورا مشر سيد باقر هاشمي وويل: ((سوله د هربشراړتیا ده موږ د دغې اړتیا پوره کولو لپاره غواړو غږ پورته کړو سوله غواړو هغه سوله چې روانه جګړه ختمه کړي.))
هاشمي وویل، له ټولو ښکېلو خواو او هغو هېوادونو چې د سولې په روانو خبرو کې رول لري غوښتنه کوي ترڅو نور د افغانستان خونړي داستان ته د تل لپاره پای ورکړي .
دغه راز د پلخمري جامع جومات خطیب مولوي برهان وویل چې حکومت او طالبان بايد د سولې په برخه کې د ديني عالمانو غوښتنه ومني.
ده وویل: ((هیڅ یو دیني عالم له هېواد سره خیانت نه دی کړی دیني عالمان د افغانستان ریښتیني دفاع کوونکي دي، حکومت او طالبان يې بايد د سولې غوښتنه ومني.))
يو شمېر نورو ديني عالمانو هم ورته څرګندونې وکړې.
د غونډې په پاى کې د بغلان د ولايت مقام په استازيتوب مفتي عبدالحليم وويل چې د سولې په برخه کې حکومت او طالبان دې يو بل ته ستر شرطونه نه ږدي.
هغه وايي: ((د سولې له رامنځته شي فرصت بايد ګټه واخيستل شي، د ديني عالمانو غوښتنې ته بايد ځواب و ويل شي.))
د يادونې ده، له څه باندې يو کال راهيسې د امريکا او طالبانو د استازو ترمنځ د افغان سولې په تړاو د قطر هېواد په دوحې ښار کې خبرې روانې دي خو تر اوسه دوه ځلې دغه خبرې درول شوي او کومې پايلې ته سره نه دي رسيدلي.
غړيYou need to subscribe to view the full article. Please login or register a new account.
