<p>کابل (پژواک، ۱۱ وری ۹۹): د جمعیت اسلامي شورا رهبري د حکومت له خوا د سولې بهیر لپاره د مذاکراتي پلاوي د ملاتړ ترڅنګ له حکومته غوښتي څو په مذاکراتو کې د داخلي سیاسي جنجالونو د حل لپاره اساسي قانو تر پښو لاندې نه کړي.</p>
<p>دا په داسې حال کې ده چې افغان حکومت درې ورځې مخکې د ملي امنیت د پخواني رییس معصوم ستانکزي په مشرۍ له طالبانو سره د بین الافغاني خبرو لپاره ۲۱ کسیز پلاوی اعلان کړ، خو طالبانو ویلي چې دغه ټېم ټولشمول نه دی.</p>
<p>د افغانستان د جمعیت شورا رییس سید ابراهیم عماد نن په کابل کې په یوه خبري غونډه کې له طالبانو سره د مذاکراتو لپاره د حکومت له خوا د ټاکل شوي پلاوي ملاتړ وکړ او ویې ویل: «ملي ګټو ته پر حزبي، قومي او سمتي ګټو ارزښت ورکوو، که دغه پلاوی ګټور نه و، کېدای شي په بل پړاو کې په کې بدلونونه راشي.»</p>
<p>هغه یاد پلاوی ټولشمول وباله او زیاته یې کړه: «که طالبان ځان د افغان ملت برخه بولي، بهانې دې نه لټوي او د دښمنانو په پټو او ښکاره اشارو د خبرې نه کوي، د دولت له پلاوي سره د خبرې وکړي، له دې پرته د خلکو دښمنان دي او پر واړندې به یې مابارزه وشي، خلکو په دې لړ کې قرباني وکړې او تیار دي چې بیا ځلې هم قرباني ورکړي.»</p>
<p>هغه همداراز د طالبانو له ډلې وغوښتل څو د تلپاتې سولې او څلوېښت کلنې جګړې د پای ته رسېدو لپاره مرسته وکړي او په هغه صورت کې چې پلاوي مذاکرات مخې ته نه شووړلای، بدلون به په کې رامنځته شي.</p>
<p>عماد د ولسمشر محمد اشرف غني او عبدالله عبدالله چې ځان یې ولسمشر اعلان کړی، ترمنځ سیاسي اختلافاتو ته په اشاره وویل: «د جمعیت شورا رهبري د ولسمشرۍ له ټاکنو مخکې د محمد اشرف غني په مشرۍ له دولت جوړوونکي ټېم ملاتړ کړی و څو د قانون له نقض کولو مخه ونیول شي، اوس مو د دغه ټېم له رهبرانو غوښتنه دا ده چې پر خپلو وعدو عمل وکړي.»</p>
<p>د ټاکنو خپلوال کمېسیون له خوا د ولسمشرۍ ټاکنو د وروستیو پایلو له اعلان وروسته چې محمد اشرف غني یې ولسمشر اعلان کړ، خو د دې ټاکنو بل مخکښ نوماند ډاکتر عبدالله عبدالله دغه اعلان شوې پایلې ونه منلې او ټولشموله حکومت یې اعلان کړ او په پای کې غني او عبدالله دواړو د کب په ۱۹مه په کابل کې په یوه وخت د لوړې مراسم تر سره کړل.</p>
<p>که څه هم د لوړې له مراسمو وړاندې او وروسته د غني او عبدالله ترمنځ د جنجالونو د حل لپاره د افغانستان او امریکا یو شمېر استازو هڅې وکړې خو کومه پایله یې نه درلوده.</p>
<p>د افغانستان د جمعیت اسلامي شورا رییس وایي چې د سیاسي ناندریو د حل لپاره باید اساسي قانون تر پښو لاندې نه شي او له مغلوب ټېم څخه باج واخیستل شي.</p>
<p>عماد د دوو لوړو د مراسمو تر سره کول او د دوو موازي حکومتونو رامنځته کول د افغانانو پر هویت بازي وبلله او وویل چې مغلوب ټېم ته باید د کار وخت ورکړل شي خو د اساسي قانون مواد باید نقض نه شي.</p>
<p>هغه له نړیوالې ټولنې وغوښتل څو له خلکو او د افغانستان له اسلامي جمهوري نظامه ملاتړ وکړي او اجازه ورنه کړي د افغانستان د خلکو قربانۍ نادیده ونیول شي.</p>
<p>عماد وایي چې د افغانستان د جمعیت اسلامي د شورا رهبري د حکومت تر څنګ ولاړه ده او د حکومت رهبري باید د مغلوب ټېم نامشروع غوښتنو ته سر ټیټ کړي.</p>
