<p>کابل (پژواک، ۱۲ چنګاښ ۹۹) : د جمعیت اسلامي ګوند شاوخوا ۵۰ غړو په یوه ناسته کې پرېکړه کړې ده چې د عمومي غونډې تر جوړېدو پورې به د صلاح الدین رباني پر ځای، سید عنایت الله شاداب د ګوند مشري پر غاړه ولري.</p>
<p>خو د جمعیت ګوند د رهبرۍ یو غړی دا پرېکړه مردود ګڼي.</p>
<p>دا په داسې حال کې ده، چې د جمعیت د پخواني مشر برهان الدین رباني تر وژل کېدو وروسته د هغه زوی صلاح الدین رباني د ګوند د مشر په توګه وټاکل شو او تر اوسه يې دا دنده پرمخ بیوله.</p>
<p>د جمعیت اسلامي ګوند د اجراییه شورا مشر عطاء محمد نور په خپله فیسبوک پاڼه کې لیکلي، چې د تېرې ورځې په ناسته کې چې د ګوند له مهمو غړو څخه دوه په درې برخه غړو ګډون کړی وو، د سولې پروسې، حکومت کې پر مشارکت، د ګوند پر فعالولو بحثونه شوي او ځینې پرېکړې یې کړې دي.</p>
<p>هغه زیاته کړې: (( د ګوند عمومي غونډې جوړولو کمېسیون ته دنده وسپارل شوه چې د جمعیت ګوند د بیافعالولو په موخه ژر تر ژره د عمومي غونډې لپاره زمینه برابره کړي.))</p>
<p>د نور په وینا، په دغه ناسته کې دغه راز تصمیم ونیول شو چې د ګوند د رهبري شورا غړی او یو له بنسټ ایښودونکو څخه استاد عنایت الله شاداب د عمومي غونډې تر جوړېدو پورې به د ګوند د ناستو مشري پر غاړه ولري.</p>
<p>هغه زیاته کړې چې جمعیت اسلامي له سولې پروسې بشپړ ملاتړ کوي او غواړي چې د ملي مصالحې شورا کې فعاله ونډه او رول ولري.</p>
<p>عطاء محمد نور لیکلي چې دغه راز په دې ناسته کې په حکومت کې د جمعیت پر فعاله رول ټینګار وشو او پرېکړه وشوه چې د جمعیت اسلامي او د جهاد او مقاومت د حوزې د مشرانو ترمنځ د همغږۍ لپاره یوه مرکزي هسته رامنځته شي.</p>
<p>د نور په وینا، یادې پرېکړې د جمعیت اسلامي د رهبرۍ شورا د ۴۷ فعالو غړو له خوا تایید شوی دی.</p>
<p>دا په داسې حال کې ده چې د جمعیت اسلامي رهبري شورا اوسمهال ۶۲ غړي لري.</p>
<p>د جمعیت اسلامي سرچینو رسنیو ته ویلي، دا چې دغه ګوند د سولې مذاکراتو کې کمزوری شتون لري او له بلې لخوا صلاح الدین رباني د ملي مصالحې شورا سره مخالفت لري ، نو ځکه د ګوند د رهبرۍ شورا ډېرو غړو پرېکړه وکړه چې رباني د ګوند له مشرۍ لرې کړي.</p>
<p>د سرچینې په وینا، د جمعیت اسلامي د رهبري شورا غړي د ولسمشر لومړي مرستیال امر الله صالح، سره ښې اړیکې جوړې کړې او پر دې باور دي چې صالح به په راتلونکي کې د جمعیت ګوند او مجاهدینو له دریځ څخه کلک ملاتړ کوي.</p>
<p>خو د جمعیت اسلامي د رهبري شورا بل غړی ډګر جنرال جان احمد حقجو د شورا د ځینو د غړو د پرونۍ ناستې په اړه په خپل فیسبوک کې لیکلي دي : (( دا چې په یاده ناسته کې د ګوند مشر صلاح الدین رباني او نور غړو برخه نه درلوده، نو پرېکړې یې مردودې دي.))</p>
<p>هغه زیاته کړې، جمعیت اسلامي په خپل تاریخ کې له معامله ګرۍ او له کودتا سره مبارزه کړې ده، کوم کسان چې د تفرقې اچولو په هڅو کې دي خپل ارمانونه به ګور ته یوسي.</p>
<p>پژواک هڅه وکړه چې په دې اړه د صلاح الدین رباني نظر هم واخلي خو بریالی نه شو.</p>
<p>د یادونې ده چې جمعیت اسلامي په تېرو ټاکنو کې د عبدالله په مشرۍ د ثبات او همپالنې له ټاکنیز ټکټ څخه ملاتړ کړی و، خو کله چې ډاکټر عبدالله او ولسمشر غني سیاسي موافقه وکړه، نو دغه ګوند خپل مخالفت اعلان کړ.</p>
<p>جمعیت اسلامي د ولسمشرۍ ټاکنو د پایلو له اعلان سره هم مخالفت ښودلی او ادعا یې کړې وه چې یادو ټاکنو مشروعیت نه درلود.</p>
