کندوز ښار (پژواک، ٦ ليندۍ ٩٩): د بشري حقونو مسوولين وايي چې د شمال ختيځ په درېيو ولايتونو کې د ښځو پر وړاندې د تارتريخوالي ٢٠٤ قضيې ثبت شوې دي چې ٥٤ يې د وژنې پېښې دي.
د کندوز د بشري حقونو د ولايتي کمېټې مشر حفيظ الله فطرت وويل چې په دغه ولايت کې په تېر يو کال کې په کندوز، تخار او بغلان ولايتونو کې د ښځو پر وړاندې د تاوتريخوالي ٢٠٤ قضيې ثبت شوې دي.
هغه وايي: ((د تېرکال په پرتله يې شمېره کمه ده خو د اندېښنې ځاى دا دى چې د لسو ځان وژنو ترڅنګ ٤٤ د وژنې پېښې په کې دي.))
دغه راز کندوز کې د ښځو شبکې مسوولې مرضيه رستمي وويل چې د نا امنيو له امله د ښځو پر وړاندې د تاوتريخوالي کچه لوړيږي.
دا وايي، که چېرې د نا امنيو مخه ونه نيول شي د ښځو پر وړاندې د تاوتريخوالي کچه به څو برابره لوړه شي.
بل لورته کندوز کې د امن خونو مسوولې شميلا صاحب زاده وويل چې د نا امنيو له امله ډېرى ښځې نه شي کولاى د دوى پر وړاندې د تاوتريخوالي پېښې ثبت کړي.
د يادونې ده چې هرکال د نوامبر ٢٥ مه د ښځو پر وړاندې د تاوتريخوالي د مخنيوي په موخه نمانځل کيږي.
