کابل (پژواک، ١٨ ليندۍ ٩٩): د افغانستان د ملي دفاع وزارت د ملکي تلفاتو د ډېرېدو په تړاو د يوه امريکايي پوهنتون څېړنيز راپور رد کړى دى.
د امریکا څېړونکي وايي، له ۲۰۱۷ کال راهیسې په افغانستان کې د هوايي بریدونو له امله د ولسي وګړو مرګ ژوبله ۳۳۰ سلنې ته پورته شوې ده.
د امريکايي رسنيو د راپورونو له مخې، دا مرګ ژوبله وروسته له هغه دومره ډېره شوه، چې امریکايي پوځ په ۲۰۱۷ کال کې پر طالبانو د هوايي ګوزارونو په اړه خپل مقررات نرم کړل.
د امريکا د واټسن انستیتيوت په دغه راپور کې راغلي، د يادې مودې په هوايي بريدونو کې ملکي تلفات ۳۳۰ سلنې ته زیات شول چې یوازې تېرکال په کې ۷۰۰ کسان وژل شوي دي.
د امريکا د ياد پوهنتون د څېړونکو په وینا، د دې مرګ ژوبلې ډېرېدل دوه لاملونه لري؛ لومړی په افغانستان کې د امریکايي پوځیانو د شمېر کموالی او دویم د سولې خبرو ته د طالبانو اړ ايستلو لپاره پر هغوی د فشار ډېرول.
په افغانستان کې په هوايي بریدونو کې د ملکي وګړو د مرګ ژوبلې په اړه دا څېړنه براون پوهنتون کړې ده.
د راپور له مخې، د ۲۰۱۹ کال په هوايي بريدونو کې ۷۰۰ ولسي وګړي وژل شوي دي.
راپورزیاتوي چې له طالبانو سره له هوکړې وروسته د امریکايي ځواکونو بریدونه کم، خو د افغان ځواکونو هوايي بریدونه ډېر شوي او د ادعا له مخې، افغان ځواکونو تر بل هر وخت ډېرو ملکي وګړو ته زیان اړولی دی.
په دې راپور کې ادعا شوې چې د روان کال په لومړیو شپږو میاشتو کې د افغان هوايي ځواکونو په بریدونو کې ۸۶ ملکي وګړي وژل شوي او ۱۰۳ نور ټپيان شوي دي، خو درېیمه ربعه کې ۷۰ ولسي وګړي وژل شوي او ۹۰ نور ټپيان دي.
د دغه امريکايي پوهنتون په راپور کې د امریکايي ځواکونو له وتلو په استفادې د طالبانو له خوا پر افغان حکومت د نظامي فشار زیاتېدو ته هم اشاره شوې او زیاتوي، که اوربند ونه شي نو دواړه لوري به د خبرو پرمهال د برلاسي کېدو لپاره هڅو ته دوام ورکړي او ښايي له امله یې د ملکي تلفاتو شمېر نور هم لوړ شي.
خو د افغانستان د ملي دفاع وزارت د دغه امريکايي پوهنتون ادعا رد کړې ده.
د ملي دفاع وزارت د وياند مرستيال فواد امان پژواک اژانس ته وويل، چې په افغانستان کې د ملکي مرګ ژوبلې اصلي عاملين وسله وال طالبان دي.
هغه زياته کړه، چې طالبان د خلکو په کورونو کې پټيږي، ملکي وګړي د سپر په توګه کاروي، په ښارونو کې چاودنې او ځانمرګي بريدونه کوي.
امان وايي، چې د ملکي وګړو د ځان او مالي ساتنه د ملي پوځ دنده ده، دوى خپل ځان له ګواښ سره مخ کړى، خو د خلکو ساتنه يې کړې ده.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن