لښکرګاه (پژواک، ٢٢ مرغومى ٩٩): د هلمند په مرکز لښکرګاه کې د ملي امنيت پر سرتېرو موټربم بريد شوى چې په ترڅ کې يې يو سرتېرى وژل شوي او ١٥ نور ټپيان شوي دي.
په هلمند کې يوې باوري حکومتي سرچينې د مرغومي په ٢٢مه پژواک خبري اژانس ته وويل چې تېره شپه شاوخوا اووه بجې د مرکز لښکرګاه اړوند په مختار سيمه کې د ملي امنيت په چوکاټ کې د سنګوريانو پر يو ټولي موټربم بريد وشو.
هغه د نورو جزيئاتو له ورکولو ډډه وکړه.
خو يوې بلې سرچينې پژواک ته وويل چې په دغه بريد کې يو سرتېرى وژل شوى او ١٥ نور ټپيان شوي دي.
د هلمند امنيتي مسوولين بيا په دې اړه له څه ويلو ډډه کوي.
د سيمې يوه اوسېدونکي نورالله پژواک ته وويل: ((چاودنه ډېره قوي وه، زموږ د کور دېوالونه او دروازي يې وخوځول، ما فکر وکړ که هرڅه يې ړنګ کړل.))
بل لور ته د يادې چاودنې مسووليت تر اوسه چا په غاړه نه دى اخيستى.
Visits: 74
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن