کابل (پژواک، ٦ غويى ١٤٠٠) : د افغانستان کرکټ بورډ وايي چې ډاکټر حامد شينوارى د دغې ادارې د نوي اجراييوي رييس په توګه مقرر او رسماً معرفي شو.
د کرکټ بورډ وياند فريد هوتک د غويي په ٦مه، پژواک اژانس ته وويل چې د افغانستان کرکټ بورډ ادارې، د اجراييه ریاست بست ته د ازادې او شفافې سیالۍ له لارې له ګڼو کسانو ازموینه اخيستې وه.
هغه زياته کړه، چې په پايله کې يې ډاکټر حامد شینواری ياد ریاست ته بریالی او نن د یوې غونډې په ترڅ کې د ادارې کارکوونکو ته د مخکني اجراييوي رييس رحمت الله قريشي له لوري معرفي شو.
قريشي ، ډاکټر حامد شینواري ته د نوي مسوولیت د مبارکۍ ورکولو ترڅنګ وويل چې بايد خپله ټوله پاملرنه په هېواد کې د کرکټ لوبې ودې او پرمختګ ته وکړي.
د کرکټ بورډ نوي اجراييوي رييس ډاکتر حامد شینواري وويل : (( دا چې موږ د کرکټ نړیوالې شورا سره د بشپړ غړیتوب لرونکی هېواد یو؛ نو د دې امتیاز پاللو او ساتلو لپاره به په ګده لا ډېر کار کوو. ))
هغه زیاته کړه، دا چې نړۍ د پرمختګ لور ته روانه ده؛ نو دوى هم په اداره کې د نوو پرمختللو سیستمونو رامنځ کولو لپاره باید لا ډېره هڅه وکړي؛ تر څو افغانستان لوړو موخو ته ورسوي.
نوی اجراييوي رييس وایي، لوبغاړو ته به ټولې لازمې اسانتیاوې برابروي او له شته ظرفیت څخه به سالمه ګټه پورته کوي.
ډاکټر حامد شینواری د روغتیایي پالیسۍ د مدیریت برخه کې د دوکتورا تر کچې لوړې زده کړې لري او له دې وړاندې یې د افغانستان کرکټ بورډ په ګډون په ګڼو نورو ملي او نړیوالو ادارو کې د مدیریت او رهبرۍ په کچه دندې ترسره کړې دي.
هغه تر دې مخکې هم د افغانستان کرکټ بورډ د اجراييوي رييس په توګه دنده ترسره کړې ده.
