هرات ښار (پژواک، ۱۳غویی۱۴۰۰): په هرات کې سیمه ییز چارواکي، د دغه ولایت په فرسي ولسوالۍ کې د طالبانو د دوو موټربم او لویو بریدونو خبر ورکوي.
د هرات د والي ویاند جیلاني فرهاد نن پژواک ته وویل چې تېره شپه طالبانو لومړی د دغه ولایت د فرسي ولسوالۍ او امنیه قوماندانۍ پر ودانیو دوه موټربم بریدونه ترسره کړل، بیا وروسته له امنیتي ځواکونوسره په نښته کې ښکېل شول.
د ده په وینا، امنیتي ځواکونو له مخکې څخه چمتووالی درلوده او د جګړې په پایله کې ۳۰ وسله وال طالبان ووژل او ټپیان شول.
ده زیاته کړه چې تراوسه پورې معلومه نه ده چې د ۳۰ طالبانو له ډلې څو وژل شوي او څو تنه یې ټپیان دي.
ده د امنیتي ځواکونو د مرګ ژوبلې په اړه څه ونه ویل، خو په هرات کې یوې باوري سرچینې د نوم نه ښودلو په شرط پژواک ته وویل چې په فرسي ولسوالۍ کې د موټر بم له امله درې امنیتي سرتېري وژل شوي او څو نور ټپیان شوي دي.
د هغه په وينا، په دغو موټر بم بریدونو کې د ولسوالۍ ودانۍ او شاوخوا کورونه ډېر زیات زیانمن شوي دي.
د فرسي ولسوالۍ اوسېدونکي وایي، د تېرې شپې د موټر بم په بریدونو کې په دغې ولسوالۍ خلکو ته ډېر زیات مالي زیانونه اوښتي دي.
د دغو اوسېدونکو په وینا، جګړې تر سهاره دوام درلود او طالبانو د ولسوالۍ ودانۍ کلابنده کړې وه.
د هرات والي سید عبدالوحید قتالي په فرسي ولسوالۍ کې د طالبانو د تېرې شپې د برید د تائید ترڅنګ وویل، دغه راز د هرات په شینډنډ ولسوالي کې د جګړو په دوام تېره شپه ۹طالبان وژل شوي او ۱۶ نور ټپیان شوي دي.
ده زیاته کړه چې هره شپه د دغه ولایت په بېلابېلو ولسوالیو کې جګړې کیږي، خو امنیتي ځواکونه د تیارسئ په حالت کې دي او مرستندویه ځواکونه چې په هره ولسوالۍ کې یې اړتیاوې وي، لېږل کیږي.
ده وویل، طالبانو کوښښ کاوه چې په پنځه ورځنۍ جګړه کې د شینډنډ ولسوالي ونیسي، خو د امنیتي ځواکونو له مقاومت سره مخامخ شول او بالاخره ماته یې وخوړه.
له بلې خوا طالبانو تراوسه پورې په دې اړه څه نه دي ویلي.
