تخار کې د ملي امنیت اته منسوبین وژل شوي

تالقان (پژواک، ١٥ غويى ١٤٠٠): یوه امنیتي سرچینه وايي چې د تخار په مرکز تالقانو کې د ملي امنيت د مفرزه قطعې اته سرتېري وژل شوي دي.

په تخار کې يوې امنيتي سرچينې د غويي په ١٥مه پژواک خبري اژانس ته وويل چې تېره شپه وسله والو طالبانو د مرکز تالقان په قلبرس سيمه کې د ملي امنيت د مفرزه قطعې سرتېرو پر يوې پوستې بريد وکړ.

سرچینه وايي چې په بريد کې د يادې قطعې اته سرتېري وژل شوي او يو بل طالبانو له ځان سره بيولى دى.

دغه راز يوې بلې سرچينې هم د اتو سرتېرو وژل کېدو موضوع تاييد کړه خو ويې ويل چې د تېرې شپې په جګړه کې طالبانو ته هم مرګ ژوبله اوښتې خو کره شمېره يې تر اوسه معلومه نه ده.

بل لور ته وسله والو طالبانو تر اوسه په دې اړه څه نه دي ويلي.

د يادونې ده، په تېرو څو ورځو کې په ټولو ولايتونو کې جګړو زور اخيستى چې خلک يې سخت اندېښمن کړي او له حکومته په دې برخه کې د جدي تدابيرو غوښتنه کوي.