کابل (پژواک، ۱۷ غویی ۱۴۰۰): برېښنا شرکت وایي، چې نن سهال د وارداتي برېښنا دوه پایې د کابل ولایت په کلکانو ولسوالۍ کې په ماینونو الوځول شوي او درېيمه پایه هم يو څه نړول شوې ده.
د دې شرکت له خوا په خپره شوې اعلامیه کې راغلي، چې دغه پېښه نن سهار شاوخوا ۴:۴۵ دقیقې د کلکانو ولسوالۍ د میرزاخېلو په سيمه کې را منځته شوې ده.
سرچينه زياتوي، په څلورمه پایه کې هم ماین نښلول شوی او د ملي اردو د انجنيري ټیم هڅه کوې چې له منځه يې یوسي.
برېښنا شرکت وایي، د کار زمينې په برابرېدو سره د برېښنا شرکت ډله چمتووالی لري چې د پایو د نصب او بیا جوړولو کار پیل کړي.
همدا اوسمهال وارداتي برېښنا په کابل او نورو اړوندو ولایتونو پرې شوې ده.
