د يوه پولیس سرتېري کوژدنې د خاوند تر وژل کېدو وروسته ځان وژنه کړې

ترینکوټ (پژواک، ۱۸ غویی ۱۴۰۰): په اروزګان کې یوې کوژده شوې نجلۍ د خپل خاوند تر وژل کېدو دوه ساعته وروسته ځان وژنه کړې ده.

د مرکز ترینکوټ ښار اړوند په چرمګر سیمې کي یوې نجلۍ تر هغه وروسته ځان وژنه کړې، کله چې د خپل کوژدن له وژل کېدو خبره شوه.

د سیمې اوسېدونکي وایي، د دې نجلۍ کوژدن زین الله تېره ورځ د ترینکوټ ښار اړوند په نچین سیمه کې له طالبانو سره مخامخ نښته کې ووژل شو، خو مېرمن یې د هغه تر وژل کېدو وروسته ځان وژنه وکړه.

د چرمګر یوه کلېوال باریداد پژواک اژانس ته وویل، نجلۍ د هغوی د کلي د یوه ملک عبدالعلیم لمسۍ وه او دوه میاشتي مخکې یې له زین الله سره کوژده شوې وه.

د ده په وينا، هغې په خپل کور کې په تومانچه پر ځان ډزې کړې وې چې روغتون کې یې ساه ورکړه.

امنیتي او ځایي مسوولینو رسنیو ته د زین الله د وژل کېدو او د هغه د مېرمنې د مړینې په تړاو څه نه دي ویلي.

خو د ترینکوټ ولایتي روغتون یوه نوکریوال پژواک ته وویل، پرون ناوخته یوه ښځه ور وړل شوې وه چې پر سر پر مرمۍ لګېدلې وه.

سرچینه زياتوي، دغې مېرمنې روغتون ته په رسېدو سره ساه ورکړې وه.