مهترلام (پژواک، ۳ غبرګولی ۱۴۰۰): لغمان کې امنيتي چارواکي وايي چې د ولايت په مرکز کې د وسله والو لوی بريد يې پر شا تمبولی او د وظيفوي غفلت له امله ١١٠ نظاميان نيول شوي دي.
دا کسان په داسې حال کې نيول شوي چې په دې وروستيو کې د لغمان دولت شاه ولسوالۍ سقوط شوه، په الينګار کې هم تر سختو نښتو وروسته جګړه د ولايت مرکز مهترلام ته ورسېده.
پرون له غرمې وروسته وسله والو طالبانو په مهترلام ښار کې د ولايت پر مرکزي محبس هم بريدونه وکړل، خو د ځايي چارواکو په وينا، د هغوى بريدونه پر شا وتمبول شول.
د لغمان والي رحمت الله يارمل وايي چې د وروستيو نا امنيو په تړاو د وظيفوي غفلت له امله ١١٠ نظاميان نيول شوي دي.
هغه زياته کړه چې په دې نيول شوو کسانو کې د ملي امنيت ریاست اوپراتيفي مرستيال هم شامل دى او له دوى څخه پلټنې پيل شوې دي.
بلخوا د هېواد د وسله والو ځواکونو د لوى درستيز جنرال ياسين ضياء په مشرۍ له مرکزه لوړپوړى امنيتي پلاوى له کومانډو ځواکونو سره لغمان ته رسېدلی او له تېرې شپې راهيسې يې چاڼيز عمليات پيل کړي دي.
