بدخشان کې د ترافیکي پېښې له امله ۱۷ کسانو ته مرګ ژوبله اوښتې ده

فیض اباد (پژواک، ۱۰ غبرګولی ۱۴۰۰): په بدخشان ولایت کې د یوه مسافر وړونکي موټر چپه کېدو پېښه کې د ښځو او ماشومانو په ګډون ۸ کسان مړه شوي او ۹ نور ټپيان دي.

د بدخشان  د والي ویاند نیک محمد نظري پژواک خبري اژانس ته وویل چې دغه پېښه نن له غرمې مخکې شاوخوا لس بجې د دغه ولایت د ارغنجخواه ولسوالۍ په تقصاب کلي رامنځته شوې ده.

نوموړي زیاته چې دغه پېښه هغه مهال رامنځته شوه چې یو «صرف» موټر له عمومي سړکه ووت او چپه شو.

هغه وویل چې په دې پښه کې  ۸ مسافر مړه شوي او ۹ نور ټپيان دي.

د بدخشان د والي د ویاند په خبره، دغه موټر د ارغنجخواه له  لوري د دغه ولایت مرکز فیض اباد ته پر لاره له یادې پېښې سره مخ شو.

ده زیاته کړه چې په مړه شوو کې درې مېرمنې او یو ماشوم شامل دي یوه مېرمن او یو ماشوم ټپيان دي.

د نظري د معلوماتو له مخې چې د دې پېښې ټپيان د شهید استاد رباني روغتون ته لېږدول شوي او څلور کسان له درملنې وروسته رخصت شوي او ۵ نور تر درملنې لاندې دي.