<p style="text-align: justify;">کابل (پژواک، ۲۹ غبرګولی ۱۴۰۰): د افغانستان د عدليې وزارت وایي چې په هېواد کې به د بین المللي پوهنتونونو فعالیت ډېر ژر قانوني شي.</p>
<p style="text-align: justify;">د دغه وزارت په خبرپاڼه کې چې نن خپره شوې او کاپي یې پژواک خبري اژانس ته را لېږل شوې، راغلي دي: «په هېواد کې د بین المللي پوهنتونونو د فعالیت او ايجاد په وړاندې د قانوني ستونزو د هوارولو موظفې کمېټې» په يوه غونډه کې د عدليې وزارت د مسلکي معين عبدالمجيد غني زاده په ګډون د يوه تقنيني سند د جوړولو له لارې د دغو پوهنتونونو د فعاليت قانوني کولو په اړه بحث او خبرې وکړې.</p>
<p style="text-align: justify;">سرچینې زیاته کړې، په دغه ناسته چې په انلاین ډول ترسره شوه، د لوړو زده کړو علمي مرستیال عبدالتواب بالاکرزي، د مالیې وزارت مالي مرستیال عبدالحبیب ځدراڼ، د بهرنیو چارو د حقوقو ریاست او معاهداتو مرستیال او د جمهوري ریاست د چارو ادارې عمومي ریاست د ټولنیزو او فرهنګي ریاست مرستیال ګډون کړی وو.</p>
<p style="text-align: justify;">په خبرپاڼه کې راغلي، د کمېټې غړي په هېواد کې د بین المللي پوهنتونونو د تقنیني سند د تدوین په جوړولو، د بین المللي پوهنتونونو حقوقي شخصیت او د هغو د مالي موضوعاتو، د افغانستان او ترکیې ترمنځ د تفاهمنامې د چټک کېدو او نهایي کېدو، په هېواد کې د مولانا جلال الدين محمد بلخي د مشترک بین المللي او دې ورته نورو پوهنتونونو د رامنځ ته کولو په خاطر بحث او خبرې وشوې.</p>
<p style="text-align: justify;">د عدليې وزارت مسلکي مرستیال په دغه ناسته کې وویل چې دغه وزارت به ډېر ژر د بین المللي پوهنتونونو د قانون په طرحې کار پيل کړي او د مسودې له چمتو کېدو وروسته به یې د کمېټې له غړو او اړوندو ادارو سره شریکه کړي.</p>
<p style="text-align: justify;">د هغه به خبره، دغه قانون به په افغانستان کې د بین المللي پوهنتونونو د فعالیت لپاره د لازمو اسانتیاوو د رامنځ ته کولو طرح شي.</p>
<p style="text-align: justify;">ده د کمېټې له غړو وغوښتل چې د قانون د مسودې له ترلاسه کولو وروسته په دې اړه خپل نظرونه له عدلیې وزارت سره شریک کړي، ترڅو په طرحه کې ځای پر ځای شي او طرحه د قانوني مراحلو لپاره د کابينې غونډې ته وړاندې شي.</p>
<p style="text-align: justify;">دغه راز په دغه ناسته کې پرېکړه وشوه چې د مولانا جلال الدین محمد بلخي په نوم د افغان ـ ترک د ښځو ګډ پوهنتون د جوړولو هوکړه ليک، د ګمرکي معافیت او ټولنیز خونديتوب په خاطر له ترکیې هېواد سره شریک شي او وروسته له توافقه د تایید لپاره به د افغانستان کابینې ته وړاندې شي.</p>
<p style="text-align: justify;">د کمېټې غړو په هېواد کې د بین المللي پوهنتونونو د اسانتیاوو او د مالیاتي مسایلو په څرنګوالي هم بحث او خبرې وکړې.</p>
