کابل (پژواک، ۶ چنګاښ ۱۴۰۰): د مشرانو جرګې ځیني غړي وایي چې حکومت دې له خلکو سره په همکارۍ د برېښنا پایو الوځولو مخنیوي لپاره اقدام وکړي او هغه کسان دې په سزا ورسوي چې دغه کار ترسره کوي.
د راپورونو له مخې، په تېره یوه میاشت کې ناپېژاندو کسانو د کابل په شمال کې د برېښنا تر ۱۲ ډېرې پایې ویجاړې کړې، خو بیارغول شوې او د کابل او ځینو نورو ولایتونو پرې شوې برېښنا وصل شوې ده.
دوه اوونۍ مخکې هم د برېښنا دوه پایې والوځول شوې او د کابل په ګډون د یوولسو ولایتونو برېښنا پرې شوه. د برېښنا شرکت تېره پنجشنبه اعلان وکړ چې دغه پایې به په ۷۲ ساعتونو کې ترمیم او پرې شوې برېښنا به ونښلول شي.
د برېښنا شرکت تېر ماښام اعلان وکړ چې پروان ولایت د سالنګ په اهنګرانو سیمه کې دوه ویجاړې شوې پایې ترمیم او د بغلان په خنجان ولسوالۍ کې پرې شوي مزي ونښلول شول؛ خو دغه شرکت د شپې نهه بجې بیا اعلان وکړ چې د برېښنا یوې پایې ته د پروان په رباط سیمه کې چاودنه ورکړل شوې او د برېښنا جریان پرې شوی دی.
د مشرانو جرګې په نننۍ ناسته کې په دې اړه خبرې وشوې.
د دې جرګې غړې انارکلي هنریار د هغو کسانو پر پیدا کولو ټینګار وکړ چې دغه پایې ویجاړوي او ویې ویل چې باید سزا ورکړل شي.
هغې زیاته کړه، د برېښنا شرکت او حکومت باید د پایو د ساتنې لپاره پلان ترتیب کړي.
د دې جرګې منشي فیصل سمیع هم ورته نظر درلود، ویې ویل، د پایو د امنیت لپاره باید پلان جوړ شي چې دغه پایې د سیمې د خلکو په همکارۍ وساتل شي.
د مشرانو جرګې رییس فضل هادي مسلمیار هغو کسانو ته په اشاره چې د برېښنا پایې ویجاړوي، وویل: «هغه کسان چې داسې کړنې ترسره کوي، له طالب او داعش سره هیڅ توپیر نه لري.»
هغه هم له حکومت او د برېښنا له شرکته وغوښتل چې د سیمې خلکو په همکارۍ دې د پایو امنیت ساتلو لپاره هڅه وکړي.
ده زیاته کړه: «هغه کسان چې په دې تړاو نیول شوي، باید ډېر ژر مجازات شي او د عاملان دې په نښه او تر تعقیب لاندې ونیول شي.
د هغه په خبره، د هېواد اوسني وضعیت ته په کتو چې د کرونا ناورغۍ درېیمه څپه د خپرېدو په حال کې او په ځینو کورونو کې ناروغان دي، د برېښنا قطع کول د خلکو په حق کې ظلم دی.
GET IN TOUCH
NEWSLETTER
SUGGEST A STORY
PAJHWOK MOBILE APP