کندهار (پژواک، ۲۳ چنګاښ ۱۴۰۰): د کندهار په زندان کې د بندیانو او پولیسو ترمنځ اخ او ډب شوی چې په پایله کې یې یو بندي وژل شوی او ۱۰ نور بندیان ټپیان شوي دي.
پېښه تېره شپه هغه مهال شوې چې پولیسو غوښتل یو شمېر بندیان کابل ته ولېږدوي.
یوې باوري سرچینې د چنګاښ په ۲۳مه، پژواک خبري اژانس ته وویل، تېره شپه پولیسو غوښتل یو شمېر بندیان کابل ته ولېږدوي چې بندیانو یې مخنیوی کړی دی.
سرچینه زیاتوي، پر دې مهال د بندیانو او پولیسو تر منځ اخ او ډب رامنځته شو او پولیس ډزو کولو ته اړ شول.
د سرچینې په خبره، په دې پېښه کې یو بندي وژل شوی او ۱۰ تنه نور ټپیان شوي دي.
امنیتي مسوولینو په دې اړه رسنیو ته څه نه دي ویلي.
د کندهار عمومي زندان د ښار په لوېديځ کې د سرپوزې په سيمه کې د کندهار- هرات پر لويه لاره پروت دی چېرې چې طالبانو څو ورځې وړاندې بریدونه پیل کړل او ښار ته یې د ننوتلو هڅه وکړه.
له همدې امله دغه زندان ته امنیتي ګواښونه ډېر شوي او په دې لړ کې څو ځلې پر دغه زندان د طالبانو له خوا د برید کولو ګنګوسې هم خپرې شوې دي.
اوسمهال د زندان د ساتنې په موخه سلګونه سرتېري ځای پر ځای شوي دي.
پر دغه محبس په تېرو کلونو کې درې ځله وسله والو مخالفينو بريدونه کړي او هر ځل يې په سلګونو بنديان خوشې کړې دي.
Views: 191
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن