<p style="text-align: justify;">کابل (پژواک، ۹ زمری ۱۴۰۰): ولسمشر اشرف غني وایي چې د هېواد سیاسي، جهادي مشرانو او علماوو پر سولې د ټینګار ترڅنګ له وسله والو ځواکونو د دفاع اعلان وکړ.</p>
<p style="text-align: justify;">ولسمشر غني د زمري په ۹مه په خپله فېسبوک پاڼه کې لیکلي چې نن د افغانستان اسلامي جمهوریت تر چتر لاندې له مطرحو سیاسي مشرانو، جهادي رهبرانو، د مدني ټولنې استازو، مېرمنو او علماوو سره ولیدل.</p>
<p style="text-align: justify;">هغه زیاته کړې چې دوی پر یو غږ په بشپړ ډول د هېواد د ځمکنۍ بشپړتیا او دفاع په خاطر له ملي وسلهوالو ځواکونو په داسې حال کې د دفاع اعلان وکړ چې د امنیتي او دفاعي سکتور مشرانو حضور درلود.</p>
<p style="text-align: justify;">ولسمشر ویلي، په عین حال کې ټولو پر سولې ټینګار وکړ، خو پر یو غږ یې وویل چې مشروع دفاع یې حق ده.</p>
<p style="text-align: justify;">بلخوا له ارګه په یوه خپره شوې خبرپاڼه کې راغلي، له سیاسي او جهادي مشرانو سره مشورتي ناسته نن په ارګ کې د ولسمشر اشرف غني په مشرۍ ترسره شوه.</p>
<p style="text-align: justify;">سرچینې زیاته کړې، په دې ناسته کې ټینګار شو چې د جګړې ختمول او تلپاتې او عادلانه سولې ته رسېدل د افغانستان اسلامي جمهوریت دولت لومړیتوب دی.</p>
<p style="text-align: justify;">په خبرپاڼه کې راغلي، د افغانستان اسلامي جمهوریت دغه لوړ مرام ته د رسېدو لپاره ډېرې قربانۍ ورکړې دي، په دې برخه کې د افغانستان ملي روغې جوړې شورا او د افغانستان مذاکراتي پلاوي نه ستړي کېدونکې هلې ځلې د قدر وړ دي.</p>
<p style="text-align: justify;">ارګ وایي، د افغانستان اسلامي جمهوري دولت به د سولې پروسه د پخوا په څېر تعقیبوي.</p>
<p style="text-align: justify;">په خبرپاڼه کې راغلي، د افغانستان د خلکو، ارضي تمامیت، نوامیسو، ملي بنسټونو، ګډو ارزښتونو، د ښځو حقونو او نورو هغو حقونو او ازادیو دفاع چې په اساسي قانون کې تسجیل شوي، د افغانستان اسلامي جمهوریت دولت مکلف دی او د هر ډول تعرض پر وړاندې به له یادو ارزښتونو دفاع کوي.</p>
<p style="text-align: justify;">ارګ وایي، د ترهګریزو بریدونو او یرغلونو په مقابل کې افغانستان د امنیتي او دفاعي خواکونو مېړانه او زړورتیا او د ولس ملي مسیج د ستایلو دی.</p>
<p style="text-align: justify;">په خبرپاڼه کې زیاته شوې، د افغانستان سیاسي او جهادي مشران د افغانستان امنیتي او دفاعي خواکونو د مشروع دفاع او د دوی په ملاتړ د افغان ولس بسیج نه یواځې درناوی، بلکې په ټول قوت د افغانانو د دفاع لپاره به د خلکو د لا ډېر بسیج لپاره هلې ځلې کوي.</p>
