جلال اباد (پژواک، ۲ تله ۱۴۰۰): د ننګرهار مرکز جلال اباد ښار کې د ناپېژاندو وسله والو کسانو له لوري اته کسان وژل شوي دي.
دغه پېښې د جلال اباد ښار د لومړۍ، درېيمې او شپږمې ناحيو په مربوطاتو کې د تېرو څلورويشتو ساعتونو په موده کې رامنځته شوې دي.
د ننګرهار ولايت يوې روغتيايي سرچينې د نوم نه اخیستو په شرط پژواک اژانس ته وويل چې تېره شپه د جلال اباد حوزوي روغتون ته د ښار د لومړۍ او درېيمې ناحيې له مربوطاتو څخه پنځه جسدونه ور وړل شوي دي.
د هغه په وينا، وژل شوي کسان پر ډزو لګېدلي دي خو د هويت په تړاو يې څه ونه ويل.
بلخوا نن سهار د جلال اباد ښار د شپږمې ناحيې اړوند هډې فارم سيمه کې د درېيو کسانو جسدونه موندل شوي دي.
د جلال اباد ښار د شپږمې ناحيې اوسېدونکي نجيب الله پژواک اژانس ته وويل چې د وژل شوو کسانو جسدونه طالبانو روغتون ته انتقال کړل.
د ننګرهار ولايتي چارواکو په دې تړاو رسنيو ته څه نه دي ويلي.
د دغو پېښو مسووليت چا نه دی منلی.
Views: 9308
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن