کابل (پژواک،۲۹ لړم ۱۴۰۰): د افغانستان د مالیې وزارت وایي، د دولتي کارکوونکو په معاشونو کې د تعادل راوستو طرحه رییس الوزرا تایید کړې او سر له نن څخه د کارکوونکو د درېیو میاشتو معاشونه ورکول کیږي.
د مالیې وزارت ویاند احمد ولي حقمل نن په کابل کې خبریالانو ته وویل چې د یادو درېیو میاشتو (وږي، تلې او لړم) معاشونو د ځنډ لامل په تنخواګانو کې تعادل راوستل و چې کار یې اوس د مالیې وزارت له خوا بشپړ شوی دی.
ده په معاشونو کې د تعادل راوستو په اړه جزییات ورنه کړل او ویې ویل چې د زمري میاشتې د ډېرو کارکوونکو معاشونه د وخت د نه شتون له امله د پخواني سیستم له مخې ورکړل شوي دي. دی وایي چې د زمري میاشتې د پاتې کسانو معاشونه هم ورکول کیږي.
هغه وویل چې په معاشونو کې د تعادل راوستو اړوند کارونه د رئیس الوزار او د وزیرانو شورا له خوا تایید شوي او ډېر ژر به د چارو اداره ټولو ادارو ته د مکتوب له لارې په دې اړه معلومات ورکړي.
د ده په وینا، د یاد مکتوب تر استولو وروسته به ټولې ادارې د نوې تګلارې له مخې د خپلو کارکووونکو د معاشونو استحقاقونه جوړ او اړوندو مستوفیتونو ته به یې واستوي، تر څو له مخې یې معاشونه اجرا شي.
ده وویل چې د لوړو زده کړو وزارت، علومو اکاډمۍ او عامې روغتیا وزارت کادري کارکوونکي لري او هغوی ته به کادري تنخواګانې ورکول کیږي.
دی وایي چې امتیازي تنخواګانې هم ورکول کیږي، خو امتیازي تنخوا مسلکي او تخنیکي کسانو ته ورکول کیږي او شمېر یې هم د هرې ادارې لپاره په ګوته شوی دی.
هغه وایي چې په تېر حکومت کې د دولتي کارکوونکو د معاشونو لپاره خاص ډول معلوم نه و او د ادارو کارکوونکو بېلابېل ډوله معاشونه درلودل.
