پل علم (پژواک، د کب لومړۍ نېټه ۱۴۰۰): د لوګر د پوهنې ریاست مسوولین وایي چې په دغه ولايت کې د نجونو او هلکانو د ۳۱۲ دولتي ښوونځیو له ۳۰۳۴ ښوونکو سره نغدي مرسته وشوه.
د لوګر د پوهنې رياست ویاند شاپور عرب پژواک خبري اژانس ته وویل چې دا مرسته د ملګرو ملتونو اړوند د ماشومانو د ملاتړ ادارې (يونيسف) له خوا شوې ده.
ده زياته کړه: "هر ښوونکي ته د هغه د بانک اکونټ له لارې د سل ډالرو معادل افغانۍ حواله شوې."
د لوګر د پوهنې ريیس مولوي جنت ګل عزیز له نويسف څخه د يادې مرستې له امله د مننې ترڅنګ له دغه ارګانه وغوښتل چې د ښوونکو د اقتصادي ستونزو هواري لپاره دې خپلو مرستو ته دوام ورکړي.
يو شمېر ښوونکو هم د حکومت او يونيسف د يادې مرستې هرکلی وکړ.
خو له مرستندويه موسسو یې وغوښتل چې د ښوونکو لپاره کوپون وټاکي.
د کلنګار عالي لېسې ښوونکي رحمت الله پژواک ته وویل چې د ښوونکو اوسني معاشونه د هغوی د ژوند لومړنۍ اړتياوې هم نه شي پوره کولای.
نوموړي زياته کړه چې دولت دې د ښوونکو معاشونه زيات کړي او مرستندويه موسسې دې ښوونکو ته مياشتنی کوپون وټاکي.
د پورک د نجونو لېسې ښوونکې انیسې هم پژواک ته وویل چي دا ډول مرستې دې دوامداره شي.
  . . .










