ترینکوټ (پژواک، ۱۲ کب ۱۴۰۰): چارواکي وايي، د اروزګان په مرکز ترینکوټ کې د خوړو نړیوال سازمان د چور شوو خوراکي توکو د موندلو او د عاملانو د نیولو هڅې یې روانې دي.
دوه ورځې وړاندې د مرکز ترینکوټ اوړند په مهراباد سیمه کې یو شمېر کسانو د خوړو نړیوال سازمان یو موټر خوراکي توکي چې له خلکو سره د مرستې په موخه لېږدول کېدل، د خلکو له خوا چور شول.
د اروزګان ولایت مقام یوې باوري سرچینې پژواک خبري اژانس ته وویل، دوه ورځې مخکې د مرکز ترینکوټ اړوند په ۱۵ کیلومترۍ کې د مهراباد په سیمه کې یو شمېر کلیوالو هغه موټر لوټ کړ چې له مرکزه یې خاص اروزګان ولسوالۍ ته خوراکي توکي لېږدول.
هغه زیاتوي، دا توکي د خوړو نړیوال سازمان/ WFP اړوند وو او له هغو سروې شوو کورنیو سره د مرستې په موخه لېږدول کېدل چې موده مخکې د NCC موسسې له خوا مستحقې پېژندل شوې وې.
سرچینه وايي: ((یو شمېر کلیوالو د مهر اباد په سرې اډې سیمه کې لومړی له دغه موټر څخه دوه کارټنه غوړي اخیستي وو، کله چې موټر چلوونکی د سیمې امنیتي کسانو ته په شکایت ورغلی، په موټر کې پاتې توکي هم غلا شوي وو.))
د هغه په خبره، له پېښې وروسته په سیمه کې پلټنې پیل شوې او تر دې مهاله امنیې قوماندانۍ د پېښې په تړاو لسګونه کسان له یوې اندازې غلا شوو توکو سره نیولي دي.
په عین حال کې د سیمې یو ځايي اوسېدونکی میرا جان وايي چې د خوراکي توکو په لوټلو کې د سیمې اوسېدونکي لاس لري.
د اروزګان د اقتصاد رییس مولوي حسن د پېښې په اړه معلومات نه ورکوي خو دا کار د اړوندې موسسې ستونزه ګڼي چې د دوی په ناخبرۍ کې یې اقدام کړی و.
په اروزګان کې د خوراکي توکو د مرستې موټر په داسې حال کې د خلکو له خوا چور کېږي چې د لرو سیمو اوسېدونکو څو ورځې وړاندې شکایت کړی وو چې مرستې یوازې تر مرکز ترینکوټ او نژدې ولسوالیو محدودې دي او د لرو سیمو اوسېدونکو ته نه رسېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن