کابل (پژواک، ۱۷ کب ۱۴۰۰): ملګري ملتونه وايي، په افغانستان کې د نوي سرپرست حکومت د حاکمېدو له لومړیو تر اوسه پورې نږدې ۴۰۰ ملکي افغانان وژل شوي او ډېر شمېر نور ژوبل شوي دي.
د ملګرو ملتونو په دې تازه راپور کې راغلي چې د نږدې ۴۰۰ ولسي خلکو د وژنې اتيا سلنه د داعش اړوندو وسله والو له خوا شوې ده.
راپور کې زياته شوې، په افغانستان کې د نوي نظام په څو مياشتنۍ واکمنۍ کې د ۱۱۰۰ ملکي افغانانو مرګ ژوبله ثبت شوې چې د ۳۹۷ کسانو وژنه په داعش پورې تړي او ورسره د ۵۰ مشکوکو کسانو وژل کېدو خبره هم شوې ده چې وايي له داعش سره په تړاو وژل شوي دي، له ځینو سرونه پرې شوي او پر سړکونو غورځول شوي دي.
ملګرو ملتونو دا هم ویلي چې په دغه موده کې د تاوتریخوالي له کمېدو سره ولسي مرګ ژوبله ټيټه شوې ده، خو طالبانو د بشري حقونو له ځينو کرښو پښه اړولې او د ښځو د ازادیو په ګډون یې ځينې فردي حقونه له خلکو اخيستي دي.
په جنيوا کې د دغه راپور د خپرېدو په مناسبت د ملګرو ملتونو د بشري حقونو کمېشنرې مېشل باڅلې وویل: ''د بشري حقونونو حالت د ډېرو افغانانو لپاره د ژورې اندېښنې خبره ده.''
هغې زياته کړې، د طالبانو واکمنۍ کې ځينې کسان ورک شوي، په زور نامعلوم ځای ته وړل شوي، د رسنيو او وینا د سانسور هڅې کېږي.
دا وايي: ''زه همدا ډول د مدني ټولنې د پرمختګ په اړه اندېښنه لرم، طالبان چې له ۱۹۹۶ تر ۲۰۰۱ کاله یې ښځې له کار او زده کړو ګرځولې او خپل سخت دریځې تګلارې یې پلې کړې وې، اوس وايي د هغه پرتله یې بدلون کړی دی.''
د افغانستان د اوسني حکومت مسوولینو بیا د نوموړي د دې څرګندونو په غبرګون کې تراوسه پورې څه نه دي ويلي.
