په ختیځ کې په تېرو څلورو میاشتو کې زرګونه وسلې او دولتي وسایط راټول شوي

جلال اباد (پژواک، ۲۳ کب ۱۴۰۰): امنيتي مسوولين وايي چې په تېرو څلورو مياشتو کې يې د عملياتو پر مهال له ملکي او حکومتي کسانو ۱۲زره ميله وسلې او ۳۵۰۰ دولتي موټر ترلاسه کړي دي.

د چارواکو په خبره، دا وسلې او وسايط د تېر نظام د سقوط په ورځو کې خلکو له نظامي ځايونو وړي وو چې تر کشفي راپورونو وروسته بېرته ترلاسه شوي دي.

له کابله د ختيځ زون ٢١٠ سېلاب قول اردو ته د تللي پلاوي يوه غړي مولوي سعيدالله رضوان وويل چې امنيتي منسوبينو په تېرو څلورو مياشتو کې په ننګرهار، کونړ، لغمان او نورستان ولایتونو کې ۱۲زره میله وسلې او ۳۵۰۰ بېلابېل ډول دولتي وسایط راټول کړي دي.

دی زياتوي: ((له تحول وروسته رييس الوزرا ټولو وزارتونو ته حکم صادر کړ چې خپل ټول وسايط، اسلحې او نور څېزونه ثبت کړي چې موږ په دې برخه کې د دفاع وزارت له اړخه کار کړی او ولس هم له موږ سره همکاري کړې ده.))

بلخوا په ختيځ کې د ۲۰۱ خالد بن وليد قول اردو وياند مولوي وحيدالله محمدي پژواک ته وويل چې خلک بايد حکومتي وسلې او وسايط له ځان سره ونه ساتي او په خپله خوښه دې حکومتي مسوولينو ته وسپاري.

هغه وويل: ((د ختيځ زون له ټولو مجاهدينو او ولس نه په ډېر درنښت هيله کوو، کوم وسايط او وسلې چې د بيت المال له دوی سره دي په خپله رضا باندې د ۲۰۱ خالد بن وليد قول اردو مسوولينو ته وسپاري، که نه د قول اردو منسوبين تصميم لري چې تصفيوي عمليات پيل کړي، له چا سره چې دغه وسايط ونيول شول هغه کس به د قانون منګولو ته وسپارل شي.))

دا په داسې حال کې ده چې له تېرې څه مودې راهيسې په پلازمېنې کابل او شاوخوا ولايتونو کې د نظامي وسلو او وسايطو ټولولو په موخه تصفيوي عمليات دوام لري.

غړي

You need to subscribe to view the full article. Please login or register a new account.