[restrict paid="true"]
<p style="text-align: justify;">پل علم (پژواک، ۲۵ کب ۱۴۰۰): د لوګر په مرکز پل علم کې وسله والو موټر سپرو دوه کسان لومړی تښتولي او وروسته یې یو وژلی او بل یې بېرته خوشی کړی دی.</p>
<p style="text-align: justify;">پېښه تېره ورځ غرمه د دې ولسوالۍ په پورک سیمه کې شوې ده.</p>
<p style="text-align: justify;">د سیمې یوه اوسېدونکي او د پېښې عیني شاهد احمدشاه پژواک خبري اژانس ته وویل، دغو دوو ځوانانو له ګڼو نورو ځوانانو سره یو ځای د کرنې ریاست په یوه برنامه کې په دولتي ځمکه کې مزدوري کوله چې د وسله والو موټر سپرو له خوا یووړل شول.</p>
<p style="text-align: justify;">هغه زیاته کړه: ((موږ په کار بوخت وو چې پنځه موټر راغلل او وسله وال کسان ورڅخه راکښته شول، د سلطان حمید او حسیب الله په نومونو یې دوه کسان په وهلو- وهلو موټر ته پورته کړل او روان شول، درې ساعته وروسته د سلطان حمید مړی وموندل شو خو حسیب الله بیا نن سهار خوشی شوی دی.))</p>
<p style="text-align: justify;">دی وايي، دغو کسانو له هیچا سره هیڅ راز دښمني نه درلوده او نه پوهېږي ولې داسې ورسره وشول.</p>
<p style="text-align: justify;">د میراحمد په نوم ځايي قومي مشر د دې پېښې په اړه پژواک ته وویل، کلیوالو غوښتل د وژل شوي کس جسد د اعتراض په توګه د ولایت مقام مخې ته یوسي خو دا چې یو حکومتي پلاوی کلي ته ورغلی او دوی ته یې د پېښې د څېړلو ډاډ ورکړی، له دې کاره پر شا شول.</p>
<p style="text-align: justify;">دی زیاتوي، دې پېښې د پورک کلي خلک سخت خواشيني کړي او له حکومته یې د جدي څېړنې غوښتنه کوي.</p>
<p style="text-align: justify;">امنیتي چارواکي پېښه تاييدوي خو په اړه یې ډېر جزئیات نه ورکوي.</p>
<p style="text-align: justify;">د لوګر امنیې قوماندانۍ ویاند احمدالله انس پژواک اژانس ته وویل: ((موږ په جریان کې یو، کله چې د موضوع په اړه تحقیقات بشپړ شول، بیا به معلومات درسره شریک کړو.))</p>
<p style="text-align: justify;">د معلوماتو له مخې، د وژل شوي ځوان (سلطان حمید) پلار هم په ۱۳۸۸ کال کې طالبانو د پورک کلي د خلکو پر وړاندې د نامعلوم جرم په تور وژلی و.</p>
[/restrict]
