میدان ښار (پژواک، ۱۰ وری ۱۴۰۱): د میدان وردګو ولایت ډېری بزګر وايي چې په تېره شل کلنه جګړه کې يې باغونه او کرنیزې ځمکې سختې زيانمنې شوې دي.
د مرکز میدان ښار اړوند فولادخانې سیمې اوسېدونکي محمد نذیر پژواک ته وویل چې د تېرو جګړو له امله یې ډېر باغونه وچ شوي او کرنیزو ځمکو ته یې سخت زیان رسېدلی دی.
ده زیاته کړه: "جګړې له ولسوالیو دلته را ورسېدې، موږ مهاجر شوو، باغونه مو وچ شول؛ ځکه څوک نه وو چې اوبه کړي يې وای."
د همدې سیمې یوه بل اوسېدونکي عزیزالله وويل چې په تېرو وختو کې يې باغونه د جګړې لومړۍ کرښه وو او چا خپلې ځمکې او باغونه نه شوای پاللی.
هغه زياته کړه: "په جګړو کې مو له ۲۰۰ زیاتې د مڼو ونې له منځه تللې چې څو ورځې کېږي په راټولولو يې لګیا يوو."
۳۲ کلن رحیم الله چې د نرخ ولسوالۍ د بازي خېلو کلي اوسېدونکی دی، وايي چې دلته له بزګرانو ډېرې داسې ځکمې له کرلو پاتې وې چې پریمانه اوبه یې ورته لرلې، خو د جګړو له امله په کې کښت ممکن نه و.
دی زیاتوي: "خلک غريب دي او هر کال يې د خپلو ځمکو او باغونو حاصلاتو راټولولو ته ورځې شمېري څو خپل حاصلات وپلوري او په پيسو يې د کور نورې اړتياوې پوره کړي."
دی وايي چې د تېرو جګړو له امله يې ځمکې شاړې او باغونه يې ياغي ولاړ وو.
بلخوا د دغه ولایت د کرنې رييس عبدالجبار خالد د خلکو دغه ستونزې مني.
خو وايي چې دوی په ټول ولايت کې د زيانمن شوو باغونو سروې پيل کړې څو په دې اړه له باغدارانو سره مرسته وشي.
دی وايي چې اوس يې هم د ځينو موسسو په مرسته له یو شمېر بزګرانو سره د نيالګيو مرسته کړې ده.
ده وويل: "موږ څه وخت وړاندې د سټار موسسې په مرسته د ولایت په ۹ واحدونو کې هرې ولسوالۍ ته یو یو باغ چې ۲۶۰ مېوه لرونکي نیالګي وو، بزرګرانو ته ورکړي."
ده زياته کړه چې د يادو نيالګيو لپاره هغه بزګر انتخاب شوي وو چې په تېرو جګړو کې يې باغونه زيانمن شوي وو.
هغه دغه راز وويل چې د ډاکتر عبدالوکیل قوریه دارانو انجمن هم د کرنې له رياست سره د يو شمېر لېبل لرونکو نیالګیو مرسته کړې ده چې په وينا يې، له دې نيالګيو بيا هرې ولسوالۍ ته ۳۰۰ نيالګي لېږدول شوي.
نوموړي دغه راز وويل چې سږ کال د کرنې رياست خپله د ځينو نيالګيو تخمونه کري او په راتلونکي کې به خپله قوريه ولري او خلکو ته به نيالګي ورکړي.
