جلال اباد (پژواک، ۱۵ وری ۱۴۰۱): د ننګرهار ولايت امنيتي چارواکي وايي، جلال اباد ښار کې د ګډو امنيتي ځواکونو له لوري د پیل شوو عملياتو پر مهال ۸۰ ميله وسلې او نور جنګي مهمات او وسايل ترلاسه شوي دي.
په ننګرهار کې د کور په کور پلټنې عمليات پرون پيل شوي چې په کې د استخباراتو رياست منسوبين، د امنیې قوماندانۍ پوليس، د دفاع وزارت او سرحدي ځواکونه برخه لري.
په ختيځ کې د خالد بن وليد قول اردو ویاند مولوي وحيدالله محمدي د وري په ۱۵مه پژواک اژانس ته وويل چې د ننګرهار د مرکز جلال اباد ښار اړوند مولوي خالص فاميليو، بلند غر، دامان او د سره رود شيخ مصري سيمو کې د ګډو کورنيو ځواکونو د چاڼيزو عملياتو په دوام ګڼ شمېر سپکې او درنې وسلې او مهمات ترلاسه شوي دي.
د نوموړي د معلوماتو له مخې، په ترلاسه شوو وسلو، مهماتو او وسايلو کې ۸۰ ميله بېلابېل ډول وسلې، ۱۷ دوربينونه، ۱۱۳ شاژورونه، ۷ چانټې، ۵ مخابرې، ۸۶۶ فيره بېلابېل ډول مرمۍ، ۱۱ برېښنايي وسايل، ۲ قولې باروت، ۳ لاسي برچې، ۲۵ پايې نظامي چپرکټونه، ۳ فليتې او ۴ بکسې یونيفورمونه شامل دي.
دی زياتوي چې همدا راز د عملياتو پر مهال ۴۸ جوړې نظامي يونيفورم، ۲۱ جوړې نظامي بوټان، ۳ د نظامي موټرو جالۍ، يو کېبل، ۲ نظامي بېلچې، ۲۴ امريکايي راډيوګانې، ۳ بکسې د ورکشاپ سامان، ۲۰ چانټې نظامي البسه، ۲ جعلي پلېټونه، يو کمپيوټر، ۴ نظامي زرهي خولۍ، يو انتن او نور توکي ترلاسه شوي دي.
بلخوا د ننګرهار د استخباراتو رياست چارواکي وایي چې دغه عمليات په دوو پړاوونو کې ترسره کېږي چې په لومړي پړاو کې به مرکز جلال اباد او شاوخوا سيمې او دويم پړاو کې به ټولې ولسوالۍ وپلټل شي.
د دغه رياست د ښاري امنيت مدير نصيراحمد روحاني وايي، د عملياتو موخه خلکو ته د ډاډمن امنيت رامنځته کول دي.
بل لور ته ديني عالم مولوي لطيف الله وايي چې دا ډول عمليات د خلکو د ښه امنيت لپاره ډېر ګټور دي.
هغه له خلکو وغوښتل چې په عملياتو کې دې له امنيتي سرتېرو سره همکاري وکړي او پر عمليات کوونکو یې هم غږ وکړ چې د عملياتو پر مهال له خلکو سره ښه چلند وکړي.
د ځايي مسوولينو د معلوماتو له مخې، ګډو ځواکونو دغه عمليات د لوړپوړو مسوولينو د هدايت پر بنسټ پيل کړي او څو ورځې به دوام وکړي.
غړيYou need to subscribe to view the full article. Please login or register a new account.
