<p style="text-align: justify;">لښکرګاه (پژواک، ۲۸وری ۱۴۰۱): د هلمند کروندګر او بڼوال وايي، دغه ولایت د پستې باغونو جوړولو لپاره ډېر مناسب دی او له حکومته غواړي چې دوی ته دې باغونه جوړ کړي.</p>
<p style="text-align: justify;">د یاد ولايت د کرنې رياست مسوولين بيا وايي چې سږ کال يې د پستې لس زره نيالګيو قوريه جوړه کړې او راتلونکی کال به يې پر بڼوالو ووېشي.</p>
<p style="text-align: justify;">ترسره شويو څېړنو ثابته کړې چې د هلمند مرکز لښکرګاه، نهرسراج، نادعلي، ګرمسېر او ځينې نورې سيمې د پستې باغونو لپاره ډېرې مناسبې دي.</p>
<p style="text-align: justify;">اوس په يادو سيمو کې ډېری خلکو د پستو باغونه جوړ کړي او له حاصلاتو يې راضي دي.</p>
<p style="text-align: justify;">د لښکرګاه د بولان سيمې اوسېدونکی محمد چې د پستې ۹۰۰ونې يې حاصل ته برابرې شوې دي، پژواک خبري آژانس ته يې وويل: "د پستې ۹۰۰ ونې لرم او تېر کال مې ۵۱۰کیلوګرامه حاصل ترې واخيست او ډېری برخه مو چین او نورو هېوادونو ته صادر کړې."</p>
<p style="text-align: justify;">هغه له حکومته وغوښتل چې له خلکو سره دې د پستې باغونو جوړولو کې مرسته وکړي.</p>
<p style="text-align: justify;">دی وايي: "له حکومته مو غوښتنه داده چې موږ ته دې عصري ماشينونه راکړي، څو د خپلو حاصلاتو په پروسس کې ترې استفاده وکړو."</p>
<p style="text-align: justify;">د نادعلي ولسوالۍ اوسېدونکی او بڼوال محمد لعل هم وويل، د پستې دوه جريبه ځمکه یو بڼ لري او په خبره يې چې حاصلات يې د نورو شيانو په پرتله ښه و.</p>
<p style="text-align: justify;">ده وویل: "په ایران کې مې د پستې په باغونو کې ډېر کار کړی او ښه تجربه لرم؛ دغه مېوه ښه عايد لري خو بايد سم وروزل شي."</p>
<p style="text-align: justify;">دی وايي، د خپلو حاصلاتو يوه کيلو يې په ۷۱۰ افغانۍ پلوري او له ترياکو او نورو محصولاتو ښه ګټه لري.</p>
<p style="text-align: justify;">بل خوا د هلمند ولايت د کرنې رياست وايي، راتلونکی کال به د ياد ولايت په بېلا بېلو ولسواليو کې د پستې لا زيات باغونه جوړ کړي.</p>
<p style="text-align: justify;">د دغه رياست يوه مسوول اکرام الدین نیازي پژواک پژواک ته وويل: "سږ کال مو د پستو لس زره نيالګيو کوريه کرلې اوهوډ لرو چې راتلونکی کال په هلمند کې د پستې ۱۰۰جريبه نوي باغونه جوړ کړو."</p>
<p style="text-align: justify;">دی وايي، همدا اوس په هلمند کې پر پستې سربېره پر۳۵۰ جريبه ځمکه د شفتالو، انارو او نورو مېوو باغونه جوړ شوي او خلک يې له حاصلاتو ډېر خوښ دي.</p>
