کابل (پژواک، د غويي لومړۍ نېټه ۱۴۰۱): د هېواد په یو شمېر ولایتونو کې د چاودنو له امله لسګونو کسانو ته مرګ ژوبله اوښتې ده.
دا چاودنې نن په کابل، ننګرهار، بلخ او کندوز ولایتونو کې شوې چې له امله یې د ملکي کسانو ترڅنګ یو شمېر امنیتي سرتېرو ته هم مرګ ژوبله اوښتې ده.
تر ټولو خونړۍ چاودنه د مزارشریف ښار په یوه جومات کې وه چې له امله یې لسګونو لمونځ کوونکو ته مرګ ژوبله واوښته.
دغه پېښه نن (د غویي لومړۍ نېټه) شاوخوا یوه بجه د مزار شریف ښار د دویمې ناحیې په مربوطاتو کې په داسې حال کې وشوه چې خلک د ماسپښين لمانځه لپاره دغه جومات ته تللي وو.
د بلخ د عامې روغتیا ريیس نجیب الله توانا د وژل شوو شمېر ۱۲ او د ټپیانو ۳۱ کسان یادوي.
نوموړی زیاتوي چې د ۶ ټپیانو روغتیایي وضعیت نازک ښودل شوی دی.
خو د بلخ امنیې قوماندانۍ ویاند محمد اصف وزیري وایي چې په دې چاودنه کې لس کسان وژل شوي او پنځلس نور ټپیان دي.
بلخوا په ټولنیزو شبکو کې د روغتون هغه لېست لاس په لاس کېږي چې پکې د وژل شوو کسانو شمېر ۳۱ او د ټپیانو ۸۷ ښودل شوی دی؛ خو ځایي مسوولین دا ارقام ردوي.
بلخوا ځایي امنیتي مسوولين وايي چې د کندوز ښار د پنځمې امنيتي حوزې اړوند سيمه کې پر یوه کاسټر موټر چاودنه کې ۴ کسان وژل شوي او ۱۸ نور ټپيان دي.
د کندوز امنيې قوماندانۍ ویاند قاري عبیدالله عابدي پژواک اژانس ته وویل چې نن غرمه نږدې ۱۲ بجې د قول اردو د فني کسانو چې زياتره يې مستریان وو، پر کاسټر موټر چاودنه شوې ده.
ده زياته کړه، ماین پر بایسکل ځای پر ځای شوی و چې د چاودنې له امله يې څلور کسان وژل شوي او ۱۸ نور ټپیان شوي دي. د هغه په وينا، په ټپيانو کې يوه ښځه او درې زده کوونکي لارویان هم شامل دي.
د یو بل خبر له مخې، د ننګرهار ولايت په خوږياڼو ولسوالۍ کې د امنيتي سرتېرو پر يوه رينجر موټر چاودنې له امله څلور سرتېري وژل شوي او يو بل ټپى دى.
د خوږياڼو ولسوال قاري صلاح الدين پژواک اژانس ته وويل، دا چاودنه نن سهار د دې ولسوالۍ په بره خوارانو سيمه کې شوې وه، خو تر اوسه معلومه نه ده چې دغه ماين نوى ځاى پر ځاى شوى و که له پخوانيو جګړو پاتې و.
دغه راز نن د کابل ښار د پنځمې ناحیې اړوند په فاضل بېک سیمه کې هم د سړک غاړې ماین چاودنه شوې او دوه ماشومان یې ټپيان کړي دي.
د کابل امنیې قوماندانۍ ویاند خالد ځدراڼ پژواک ته وویل، دا پېښه سهار یوولس نیمې بجې وشوه او د پېښې دوه ټپیان روغتون ته لېږدول شوي او تر درملنې لاندې دي.
د مزار شریف د چاودنې مسوولیت داعش ډلې اخیستی، خو د نورو چاودنو لا تر اوسه کومې ډلې نه دی منلی.
دا چاودنې په داسې حال کې کېږي چې د سې شنبې په ورځ د کابل ښار په دشت برچي سیمه کې د درېیو پرله پسې چاودنو له امله د امنیتي مسوولینو د معلوماتو له مخې، شپږ کسان ووژل شول او ۲۰ نور ټپيان شول.
د دې پېښې ټول ټپي او وژل شوي ماشومان او زده کوونکي وو، خو غیر رسمي سرچینو یې د مرګ ژوبلې کچه لوړه ښودلې وه.
. . .
You need to subscribe to view the full article. Please login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن