<p style="text-align: justify;">جلال اباد (پژواک، ۳ غويی ۱۴۰۱): د ننګرهار ولایت په اچين او نازيانو ولسواليو کې د تېرو جګړو له امله له سیمې بې ځايه شوې کورنۍ وايي، حکومت دې ورسره خپلو مېنو ته د ستنېدو په برخه کې مرسته او په سیمو کې دې ورته رغنیزي پروژې پیل کړي.</p>
<p style="text-align: justify;">بلخوا د دغه ولايت د کليو بيارغونې او پراختيا رياست چارواکي وايي، ډېر ژر به په یادو ولسواليو کې بې ځايه شويو ته د سرپناه، بشري مرستو، پاکو اوبو او نورو برخو کې د مرستو رسولو چارې پيل شي.</p>
<p style="text-align: justify;">تېرکال د سختو جګړو له امله د نازيانو ولسوالۍ له سپينې ژۍ او د اچين ولسوالۍ له باندر سيمې څخه سلګونه کورنۍ نورو سيمو ته بې ځايه شوې.</p>
<p style="text-align: justify;">د سينې ژۍ يوه اوسېدونکي غلام رسول وويل چې په سيمه کې يې جګړې وې، دوی بل ځای ته کډه شوي وو او کورونه يې ويجاړ شوي دي.</p>
<p style="text-align: justify;">دغه راز د اچين د باندر سيمې يوه اوسېدونکي نياز ولي غوښتنه وکړه چې د دوی په سيمو کې دې حکومت رغنيزې پروژې پيل کړي او هم دې ورسره مرسته وکړي چې خپل کورونه بېرته ورغوي او خپلو سيمو ته ستانه شي.</p>
<p style="text-align: justify;">ځینو نورو هم ورته څرګندونې وکړې او له حکومته يې د مرستو غوښتنه وکړه؛ څو وکولای شي چې خپلو کورونو ته ستانه شي.</p>
<p style="text-align: justify;">په همدې حال کې د ننګرهار د کليو بيارغونې او پراختيا رياست په نږدې راتلونکي کې په دغو سيمو کې د رغنيزو پروژو د پيلولو خبر ورکوي.</p>
<p style="text-align: justify;">د کلیو پراختيا رييس مولوي قسمت الله مبارز وايي، يادو سيمو ته د مرستیال والي په مشرۍ يو پلاوی تللی؛ ستونزې يې معلومې کړې دي او ډېر ژر به ورسره د مرستو بهير پيل شي.</p>
<p style="text-align: justify;">نوموړي د نازيانو ولسوالۍ په سپينې ژۍ او د اچين په باندر سيمه کې داخلي بې ځايه شويو کورنيو ته سپارښتنه وکړه چې خپلو سيمو ته ستانه شي.</p>
<p style="text-align: justify;">هغه يادو کورنيو ته ډاډ ورکړ چې په خپلو اصلي ځايونو کې به ورسره د سرپناه رغونې، بشري مرستو، روغتيا، پوهنې، پاکو اوبو او نورو برخو کې لازمې مرستې وشي.</p>
<p style="text-align: justify;">د يادونې ده، په تېرو څو کلونو کې د پرله پسې جګړو له مله پر اچين او نازيانو سربېره د ننګرهار له نورو ولسواليو څخه هم زرګونه کورنۍ خپلو کورونو پرېښودلو ته مجبورې شوې دي.</p>
